Medidas destacadas

O Observatorio de Igualdade

O Observatorio de Igualdade é unha fonte de información que  ten como obxectivo elaborar informes sobre as desigualdades existentes e as causas que as provocan para axudar a comprender a necesidade das políticas de igualdade adoptadas na organización e o fundamento delas.

De seguido están dispoñibles diferentes informes organizados por ano:

O Distintivo de Igualdade

O Distintivo de igualdade xorde co fin de visibilizar e de recoñecer pública e institucionalmente o esforzo de moitas persoas que, na nosa universidade, loitan día a día por investigar, ensinar, transferir, xestionar e producir coñecemento científico, incorporando a mirada de xénero e feminista. Esta iniciativa pretende recoñecer o traballo dos centros, das escolas e das facultades no eido do fomento da igualdade real e efectiva entre mulleres e homes e, deste xeito, conquerir unha universidade máis humana, igualitaria e xusta.

• Resolución  reitoral, do 20 de setembro de 2023, pola que se convoca a cuarta edición do Distintivo de igualdade destinado a escolas, facultades e centros e institutos universitarios de investigación da Universidade de Vigo
• Resolución  reitoral, do 14 de setembro de 2022, pola que se convoca a terceira edición do Distintivo de igualdade destinado a escolas, facultades e centros da Universidade de Vigo
• Resolución reitoral, do 15 de setembro de 2021, pola que se convoca a segunda edición do Distintivo de igualdade destinado ás escolas, ás facultades e aos centros da Universidade de Vigo
• Resolución reitoral, do 7 de abril de 2021, pola que se convoca a primeira edición do Distintivo de igualdade destinado ás escolas, ás facultades e aos centros da Universidade de Vigo

Guía de boas prácticas

Acceso gratuíto a produtos menstruais

Desde marzo de 2021 a Universidade de Vigo facilita o acceso gratuíto a produtos menstruais nos tres campus universitarios. En cada escola e facultade hai instalado un dispensador que se activa coa tarxeta universitaria estudantil. Permite escoller entre tampóns e compresas, que se distribúen en caixas de tres unidades, ata un máximo de tres ao mes. 

Con esta medida, a Universidade de Vigo convértese en pioneira en todo o Estado español na aposta por achegar produtos de xestión menstrual de balde. Ademais, esta acción permite dar visibilidade e dignificar a menstruación e romper o tabú.

Itinerario formativo virtual en xénero

Esta iniciativa, que ten como finalidade satisfacer as necesidades de formación en xénero da comunidade universitaria foi desenvolvida pola Unidade de Igualdade e a Área de Formación e Innovación Educativa da Universidade de Vigo, co apoio financeiro do Pacto de Estado contra a Violencia de Xénero.

Web do itinerario formativo virtual en xénero

Accións positivas na Universidade de Vigo

A Universidade de Vigo aprobou dúas medidas de acción positiva para acabar con situacións de desigualdade detectadas na carreira investigadora. 

Estas medidas adóptanse para corrixir discriminacións e fendas de xénero provocadas por un sistema social machista e desigual.  

• Resolución reitoral, do 18 de xaneiro de 2021, pola que se regula a acción positiva aprobada no consello de goberno do 29 de abril de 2019, para incluír nas convocatorias propias de docencia, de investigación e de transferencia na Universidade de Vigo
• Redución de docencia por parto ou por adopción, garda con fins de adopción ou acollemento.
  Normativa de dedicación e recoñecemento docentes do profesorado (CG 01/02/2022 modificada no CG 11/03/2022 e no CG 28/07/2022)

Axudas para realizar actividades docentes e de sensibilización

A Unidade de Igualdade impulsa un programa de axudas anual para o financiamento de actividades docentes e de sensibilización con perspectiva de xénero. 

Este programa pretende sensibilizar sobre a desigualdade de xénero, e as causas que a provocan, para implicar a toda a comunidade universitaria na consecución dun entorno máis xusto.  

Calquera persoa da comunidade universitaria pode presentar unha solicitude para organizar actividades de sensibilización. A partida de actividades docentes está restrinxida ao PDI. 

• Convocatoria 2024 de axudas para actividades docentes que promovan a perspectiva de xénero na Universidade de Vigo
• Convocatoria 2024 de axudas para a organización de actividades que contribúan á sensibilización en materia de xénero e á transmisión de valores igualitarios na Universidade de Vigo

 
Campañas: 11F, 8M e 25N

A Universidade de Vigo debe darlles continuidade ás campañas institucionais de sensibilización arredor da celebración dos días 11 de febreiro (Día Internacional da Muller e a Nena na Ciencia), 8 de marzo (Día Internacional da Muller) e 25 de novembro (Día Internacional pola Eliminación da Violencia contra as Mulleres). Tamén debe efectuar campañas de sensibilización sobre aspectos específicos das desigualdades de xénero entre mulleres e homes.