A Universidade de Vigo continúa a súa programación de andainas culturais deste curso académico, organizada pola Área de Benestar, Saúde e Deporte, coa Ruta 6. Bosques Máxicos de Castro Caldelas. Con 17 quilómetros de percorrido e dificultade media-alta, será "unha travesía polos soutos e viñedos característicos da zona, coa visita ao castelo de Castro Caldelas, unha fortaleza medieval cunha longa historia, e ao mosteiro de San Xoán de Camba, unha xoia arquitectónica da Ribeira Sacra". As persoas participantes, indican desde a actividade, "poderán perderse entre bosques que semellan sacados dun conto". As andainas están abertas á inscrición da comunidade universitaria dos tres campus da UVigo e á cidadanía en xeral.