DUVI

Diario da Universidade de Vigo

A actividade forma parte das liñas de acción do selo HR

Un curso virtual forma ao PDI sobre o retos da propiedade intelectual na contorna universitaria

O prazo de matrícula permanece aberto ata o xoves 30 de abril

Etiquetas
  • PDI
  • Ourense
  • Pontevedra
  • Vigo
  • Institucional
DUVI 28/04/2020

Proporcionarlles ás e aos participantes unha visión dos problemas, retos e solucións sobre a propiedade intelectual na Universidade é o obxectivo principal do curso virtual Propiedade intelectual e persoal docente universitario, que a Área de Formación e Innovación Educativa promove no marco do Programa de Formación Permanente do PDI. Aberto a un máximo de 30 participantes, o obradoiro, que pechará o 30 de abril o seu prazo de matrícula, está destinado ao persoal docente e investigador, aínda que poderán tamén participar outras persoas interesadas no caso de quedar prazas libres.

A actividade desenvolverase os días 5, 7, 12 e 14 de maio en horario de 16.30 a 18.30 de xeito telemático. A finalidade e “formar ao persoal docente universitario en todos aqueles temas de propiedade intelectual que lle afectan; dende a xeración de contidos, o plaxio, os repositorios institucionais, as licencias Creative Commons, a utilización de contidos de terceiros na docencia e na investigación ou a explotación de resultados de investigación, entre outros”, sinala o docente do obradoiro, Carlos Gómez, secretario xeral adxunto da Universidade de Santiago de Compostela. 

Relevante para a creación de material docente e a titorización de traballos de fin de estudos

Grazas ao seu carácter virtual, esta actividade formativa non se verá afectada pola suspensión da actividade docente presencial decretada co propósito de frear a expansión do coronavirus. A docencia centrarase en “explicacións interactivas e a realización de casos entres os participantes nas sesións”, explica Gómez. O curso comezará cunha introdución á propiedade intelectual para, pouco a pouco, ir afondado en temas como a titularidade dos dereitos de propiedade intelectual nos distintos colectivos universitarios: PDI, PAS e alumnado, as licenzas de uso libro, os límites dos dereitos de propiedade intelectual no que se refire a citas, dereito de ilustración etc., a propiedade intelectual na era dixital e nas leis, Open Access, os programas de ordenador e bases de datos, a propiedade intelectual nas teses de doutoramento, as entidades de xestión dos dereitos de autor, a defensa dos dereitos de propiedade intelectual, ou a explotación dos dereitos de propiedade intelectual xerados polo persoal docente entre outros.

Todos os coñecementos que o alumnado adquirirá durante a actividade “son aplicables no día a día do profesorado xa que afectan, por exemplo, ao material docente xerado para a realización das clases, á titorización de TFG e TFM e teses de doutoramento ou á realización e elaboración de materiais de investigación”, salienta Gómez.

No marco das liñas de acción do selo HR 

O curso forma parte das liñas de acción do selo HR, que busca mellorar o futuro profesional do persoal investigador. “Este selo trata de identificar a aquelas universidades que xeran e apoian a existencia dunha contorna estimulante e favorable ao traballo de investigación. Polo que afecta a este curso, trata de que os investigadores cumpran escrupulosamente coa lexislación de propiedade intelectual, respectando os dereitos de terceiros e que se protexan os activos de propiedade intelectual xerados nos centros universitarios, tendo en conta que o ‘coñecemento universitario’ é o principal activo dos centros de educación superior”, conclúe Carlos Gómez.