XXI Xornadas dos Servizos Universitarios de Emprego

Calidade en materia de empregabilidade universitaria
26, 27 e 28 de xuño de 2023

Para a Universidade de Vigo é un orgullo organizar as XXI Xornadas dos Servizos Universitarios de Emprego do 26 ao 28 de xuño de 2023.

Para nós, o fomento e a mellora da empregabilidade do estudantado universitario é un obxectivo estratéxico. De feito, nos últimos anos, moitas universidades crearon distintivos de calidade para incentivar o seu traballo no fomento da empregabilidade dos futuros egresados e egresadas, co fin de seren máis competitivas e atractivas no marco do Espazo Europeo de Educación Superior. Para cumprir con este labor é fundamental o papel do persoal dos servizos de emprego universitarios.

Baixo o lema «Calidade en materia de empregabilidade universitaria», nestas xornadas trataranse cuestións relacionadas con eses recoñecementos en materia de emprego universitario e con como deben avanzar os nosos servizos no futuro para que as nosas universidades poidan obtelos.

Estamos seguros de que este encontro será un foro de traballo moi frutífero para todas as persoas comprometidas coa empregabilidade do estudantado. Tamén constituirá unha magnífica oportunidade para debater sobre temas de interese relacionados coa orientación laboral, as prácticas externas, a intermediación laboral, a formación en competencias, a mobilidade transfonteiriza e o fomento do emprendemento.

Anímovos a participar nestas xornadas e a coñecer a Universidade de Vigo e a súa contorna.

Manuel Joaquín Reigosa Roger
Reitor da Universidade de Vigo