Ética na investigación

Calquera investigación debe desenvolverse dentro dos límites establecidos polo ordenamento xurídico, entre os que destacan os derivados dos compromisos éticos asumidos pola comunidade científica e as normas deontolóxicas.

A Universidade de Vigo comparte o espírito da Declaración sobre a ciencia e o uso do saber científico da UNESCO, especialmente no relativo á necesidade de que a práctica da investigación científica e os seus resultados deben estar sempre encamiñados a lograr o benestar da humanidade, respectando a dignidade e os dereitos dos seres humanos e o medio ambiente.

Coincide tamén na necesidade de adoptar medidas axeitadas en relación cos aspectos éticos da práctica científica e o uso do coñecemento científico e as súas aplicacións. Ademais, a Universidade de Vigo está adherida ao European Charter and Code for Researchers, que inclúe a Carta europea do investigador (conxunto de principios e esixencias xerais que especifican as funcións, responsabilidades e dereitos do persoal investigador) e o Código de Conduta para a contratación do persoal investigador.

Comités de ética na investigación

Para darlle cumprimento á lexislación vixente sobre os principios éticos que se deben respectar e consciente da súa responsabilidade ante a sociedade con respecto á investigación científica e á transferencia de coñecemento desenvolvida no seu ámbito, a Universidade de Vigo constituíu o Comité de ética na investigación (CETIC). 

Para un mellor desenvolvemento das súas competencias, o CETIC dispón de tres comités independentes. Cada un deles conta co seu propio regulamento e que vela no seu ámbito de especialización pola adecuación do deseño e da execución experimental ás normas vixentes, colabora co persoal de investigación na análise das implicacións éticas dos proxectos e elabora os informes requiridos.

• Comité de ética na investigación (CETIC)
  A súa misión principal é promover a cultura ética en toda a comunidade universitaria, de acordo cos principios e estándares internacionais de bo goberno, responsabilidade social e cos obxectivos de desenvolvemento sostible, ademais de velar polo cumprimento das boas prácticas en investigación e en experimentación, garantindo a integridade científica e académica.
  • Comité de xestión de riscos biolóxicos (CGRB)
    Ten como misión identificar, avaliar e previr ou reducir os efectos adversos asociados á investigación con axentes biolóxicos, con fin de garantir o uso correcto das instalacións ante os traballadores, a sociedade, o medio ambiente e as administracións.
  • Comité de ética de experimentación animal (CEEA/OH)
    Ten como finalidade fomentar en investigadores, docentes e estudantes o uso responsable e ético dos animais de experimentación e garantir o uso ético dos animais ante a sociedade e as administracións.
  • Comité de ética para a investigación con seres humanos e medio ambiente (CEISHMA)
    É responsable da avaliación dos aspectos éticos da investigación realizada na Universidade de Vigo con fins científicos que implique seres humanos, ou o medio ambiente, así como a obtención e tratamento de datos persoais que poidan afectar a dereitos fundamentais, conforme á lexislación vixente.

Mentora ética

A mentora ética é a persoa titular da Inspección de Servizos e nela recae a responsabilidade ética da universidade. Participa con voz e voto no CETIC e, como o seu propio nome indica, debe velar pola ética na Universidade de Vigo. Ten, entre as súas funcións, informar dos procedementos referidos a condutas afastadas da ética necesaria e esixible na investigación.
 

Máis información

• Guía de boas prácticas en investigación na UVigo aprobada polo Consello de Goberno o 20 de marzo de 2018) (gl | en)
• Recomendacións éticas para investigar na Universidade de Vigo (gl | en)
• Protección de datos