Acordo transformativo con Springer-Nature para publicar en acceso aberto
A Universidade de Vigo, a través do Consorcio Interuniversitario do Sistema Universitario de Galicia (CISUG), participa nun novo acordo transformativo entre a CRUE-CSIC e a editorial Springer-Nature.
Con este acordo, as universidades disporán de acceso de lectura ás revistas científicas dos paquetes Springer e Adis do editor Springer-Nature, ao tempo que impulsa o aumento das publicacións do seu persoal investigador en acceso aberto. A este respecto, o acordo habilita o acceso aberto eliminando o custo de APC (Article Processing Charges) a un número limitado de manuscritos que en conxunto estímase que chegará a superar o 80 % dos artigos publicados anualmente. Son susceptibles de beneficiarse deste acordo os artigos enviados por autores e autoras de correspondencia das tres universidades ás máis de 2000 revistas científicas con modelo de subscrición que ofrecen o acceso aberto coma opción (revistas híbridas de ambos paquetes). O acordo, que xa está en activo, estende a súa vixencia a novos artigos que sexan aceptados ata final de 2024.
Para beneficiarse do desconto do 100 % nos APC:
- O autor ou autora da correspondencia (corresponding author) deberá ser membro da Universidade de Vigo e identificarse como tal mediante o seu correo institucional.
- A data de aceptación do artigo debe pertencer ao segundo cuadrimestre de 2021 (desde o 15 de xuño).
As persoas beneficiarias comprométense a:
- Facer constar no artigo a filiación normalizada segundo o Protocolo de normalización da filiación institucional da Universidade de Vigo.
- Incluír nos agradecementos unha mención ao financiamento recibido pola Universidade de Vigo e polo CISUG.
- Depositar a versión publicada do artigo no repositorio institucional Investigo para incrementar a súa visibilidade e garantir á súa preservación a longo prazo.
Máis información nas guías:
A Biblioteca Universitaria encargarase de xestionar as solicitudes e ofrecerá soporte e asesoramento sobre o procedemento que seguir.
As consultas pódense realizar a través do enderezo accesoaberto.biblioteca@uvigo.gal
Novas relacionadas
- O Consorcio Interuniversitario do Sistema Universitario de Galicia (CISUG) participa no acordo transformativo entre a CRUE-CSIC e a editorial Springer-Nature (CISUG)
- Crue e o CSIC asinan un acordo coa editorial Springer Nature