Dentro do ciclo Docs del Mes, que a Vicerreitoría do campus promove coa colaboración do Concello, o Teatro Principal acolle a proxección de Ouaga Girls, un documental dirixido por Theresa Traoré Dahlberg, premiado nos festivais Beldocs, de Belgrado, Filministes, de Canadá, e no Carthage Film Festival de Túnez. Presentado como unha poética descrición do que significa hoxe ser unha muller nova en Burkina Faso, Ouaga Girls narra a historia dun grupo de rapazas novas que se forman para converterse en mecánicas de coches na capital deste país, que conta cunha taxa de paro xuvenil do 52%.