A Vicerreitoría do campus acolle a apertura do IV Congreso Internacional de Arte de Acción Fugas e Interferencias, o único foro académico dirixido a promover unha reflexión teórica sobre a arte de acción que se desenvolve en España. Organizado pola Universidade de Vigo, Fugas e interferencias desenvólvese entre o 28 e o 30 de novembro na sede da Vicerreitoría e no Centro Galego de Arte Contemporánea, en Santiago.

Tralo acto inaugural, terá lugar a presentación das actas da anterior edición, seguida pola mesa A acción e as súas interseccións. O programa matinal completarase ás 12.30 horas, no salón de actos da Facultade de Belas Artes, coas performances que desenvolverán alumnas da materia Proxectos de arte de acción, do grao en Belas Artes.