36 novas empresas presentan os seus produtos e servizos nos diferentes stands que reúne o espazo central do Pont-Up Store, o evento dedicado ao emprendemento que a Universidade de Vigo promove no marco do Campus Crea, co Concello de Pontevedra como patrocinador principal. Este espazo central será inaugurado ás 11.30 horas e tralo remate do acto terá lugar, entre as 12.00 e as 12.30 horas, unha visita institucional aos diferentes stands.

Un total de 46 novas empresas, seleccionadas de entre 168 candidaturas, presentan os seus proxectos a través das diferentes modalidades de participación dun evento que reúne no seu programa máis de 60 actividades. Agrupadas no Espazo de Desenvolvemento de Competencias e do Ecosistema Emprendedor, Laboratorio Creativo, Espazo Gaming, Espazo de Economía Social e Creativa, Espazo de Igualdade, Espazo de Innovación Social, Tecendo Redes e Espazo de Desenvolvemento de Competencias e do Ecosistema Emprendedor, entre o mércores 18 e este sábado 21 sucédense en diferentes espazos da cidade unha serie de coloquios, obradoiros, presentacións, exposicións ou demostracións, promovidas coa colaboración de máis de 40 entidades, empresas e institucións.