Cinco estudantes realizarán prácticas nesta institución
Alumnado de Dereito completa a súa formación na Subdelegación do Goberno
A iniciativa é froito dun convenio de cooperación educativa
Cinco estudantes da Facultade de Dereito do campus de Ourense realizarán os vindeiros meses as súas prácticas externas na Subdelegación do Goberno en Ourense co obxectivo de completar a súa formación. A iniciativa é froito dun convenio de cooperación educativa asinado en 2019 entre a Administración Xeral do Estado e a Universidade de Vigo.
Durante o período de prácticas, que constan de 135 horas, as catro alumnas e o alumno que participan nas mesmas coñecerán, intervirán e participarán nas actividades que se desenvolven nas diferentes áreas e dependencias da Subdelegación do Goberno en Ourense, tales como o Xurado Provincial de Expropiación Forzosa, o Servizo de Asuntos Xurídicos, o Servizo de Asuntos Xerais e Réxime Interior, a Área de Traballo, Inmigración e Estranxeiría ou a Oficina de Estranxeiría, entre outros. O titor do alumnado será o secretario xeral da Subdelegación do Goberno, Manuel Arias, tamén profesor na Facultade de Dereito ourensá. A última parte do período de prácticas levarana a cabo na Audiencia Nacional en Madrid baixo a supervisión do maxistrado do Xulgado Central de Menores Único José Luis Castro Antonio, onde poderán coñecer o funcionamento deste órgano xudicial.
Emilio González, subdelegado do Goberno en Ourense, e Manuel Arias recibiron este xoves ao alumnado na Subdelegación do Goberno. Durante o encontro, Emilio González sinalou a importancia da realización deste tipo de prácticas que permiten que o alumnado “aplique e complemente os coñecementos adquiridos na súa formación académica, favorecendo a adquisición de novas competencias preparatorias para o exercicio profesional e que fomenten a súa empregabilidade. Ademais, esta experiencia permite achegar a Administración Pública a aqueles alumnos que desexen proxectar a súa carreira profesional nela”. Así mesmo, o subdelegado do Goberno resaltou que “a acollida de estudantes na Subdelegación do Goberno suporá unha experiencia enriquecedora non só para o alumnado, senón tamén para os empregados públicos, que poderán compartir experiencias laborais co mundo universitario”.