O alumnado sénior afonda en como pasar do envellecemento activo ao envellecemento activista

Co lema Do envellecemento activo ao envellecemento activista, o Programa Universitario de Maiores do campus de Ourense acolle este mes de decembro a celebración dunha iniciativa da oenegué Solidariedade Internacional Galicia que busca “contribuír á formación integral das persoas maiores de 55 anos para exercer a cidadanía global, promovendo especialmente a súa participación social e voluntariado”. A actividade, financiada pola Xunta de Galicia, tamén se celebra no Campus de Vigo e noutros campus galegos.

Entre os obxectivos específicos desta actividade están capacitar en ferramentas de educación para a cidadanía global e a participación social a este colectivo; empoderalo como suxeitos políticos; ofrecerlle espazos de participación social e cidadá e crear sinerxías entre as persoas maiores e as organizacións do terceiro sector da cooperación galega abrindo espazos onde podan desenvolver voluntariado. Sobre o desenvolvemento desta acción, Alberto Vaquero, coordinador do Programa Universidade de Maiores no campus de Ourense, destaca como “o alumnado do noso programa é xente moi activa” polo que apuntou a importancia de ofrecerlle actividades que dean resposta a esta inquedanza por coñecer e facer sempre cousas novas. A pesar desta implicación do alumnado sénior, a asistencia de participantes, indica, veuse neste caso reducida debido ás circunstancias especiais provocadas pola covid-19.

Varios obradoiros e un encontro

Composto por oito horas de traballo, o programa consta de varios obradoiros presenciais e un encontro final de carácter virtual. O primeiro obradoiro ofreceu ao alumnado “unha mirada global das problemáticas sociais e medioambientais actuais, os obxectivos de desenvolvemento sostible e as relacións de interdependencia e a corresponsabilidade como ferramentas de transformación social orientada ao exercicio da participación social das persoas maiores”. O segundo obradoiro abordou coas e cos asistentes “os distintos xeitos e alternativas de participación que teñen as persoas maiores na actualidade así como unha metodoloxía de participación propia de Solidariedade Internacional de Galicia”. Nun último obradoiro, as e os participantes levaron á práctica o aprendido nos obradoiros previos, nun pequeno traballo conxunto que consistiu en deseñar unha micro‐experiencia de transformación social vencellada “ás relacións de interdependencia entre o global e o local”.

A iniciativa tamén quere pór en relación alumnado sénior de diferentes campus galegos con inquedanza no eido do activismo. “A idea é que as persoas participantes podan poñerse en contacto cos outros grupos de maiores das outras universidades galegas participantes xerando sinerxías, que compartan a súa micro‐experiencia de transformación social deseñada e que podan tamén coñecer de primeira man a testemuña dunha persoa dun país empobrecido que é referente e exemplo de participación social nunha contorna de máxima vulnerabilidade”, apuntan desde a organización.