DUVI

Diario da Universidade de Vigo

‘Puedo reconocer el entramado de los hilos’ pode verse na sede da asociación Kentada

Artistas formadas na Facultade de Belas Artes exploran as relacións entre corpo e espazo nunha exposición

Comisariada pola alumna Isis Huerga como traballo para unha materia

Etiquetas
  • Entidades Colaboradoras
  • Estudantes
  • Medios
  • PAS
  • PDI
  • Público externo
  • Pontevedra
  • Arte
  • Estudantado
  • Cultura
DUVI Pontevedra 20/05/2024

Oito artistas de diferentes xeracións, que teñen como nexo de unión a Facultade de Belas Artes, exploran, desde unha variedade de perspectivas e disciplinas, a relación entre o corpo e o espazo na exposición Puedo reconocer el entramado de los hilos, que ata o 26 de maio pode visitarse no local da asociación Kentada. Comisariada pola estudante Isis Huerga como traballo para a materia Xestión, ámbito artístico e mundo profesional, a mostra reúne as creacións de sete alumnas e exalumnas da facultade Abril Iglesias, Ainoa Simons, Raquel Álvarez, Marina Aradas, Verónica Vicente, Nerea Gundín e Celia Vilariño, xunto ás da docente Chelo Matesanz. Con traballos que abranguen da pintura ou o vídeo ata a performance, as artistas “empregan unha variedade de medios e técnicas para ofrecer as súas interpretacións sobre este tema”, sinala Huertas dunha mostra que afonda en conceptos como a experiencia, a identidade, a pertenza ou a intimidade.

Inaugurada o pasado xoves no local desta asociación impulsada por egresados da facultade, a exposición toma o seu nome dunha cita do filósofo Arthur Schopenhauer, co obxectivo de trazar unha metáfora que reflicta “a complexidade e a interconexión da experiencia humana, suxerindo que cada obra de arte é un fío nun tapiz que ofrece unha ventá a unha comprensión máis profunda de nós mesmos e do mundo que habitamos”, como sinala a súa comisaria.