DUVI

Diario da Universidade de Vigo

Galardoa as obras máis destacadas polo seu envellecemento e vixencia 

O campus vigués, recoñecido co Premio Permanencia do Consejo Superior de los Colegios de Arquitectos de España 

Etiquetas
  • Entidades Colaboradoras
  • Estudantes
  • Medios
  • PAS
  • PDI
  • Público externo
  • Vigo
  • Premios
  • Institucional
DUVI 21/06/2024

“O campus universitario de Vigo, de Miralles Tagliabue EMBT Architects, achega unha nova paisaxe universitaria ao lugar, enlazando sutilmente cos antigos edificios existentes no ano 2003”. Nestes termos explica o xurado dos premios que outorga o Consejo Superior de los Colegios de Arquitectos de España a súa decisión de recoñecer o campus universitario de Vigo co Premio Permanencia, un galardón que recoñece as mellores obras do país, tanto polo seu correcto envellecemento, como pola súa vixencia e actualidade como valores intrínsecos da arquitectura e o urbanismo.

Na gala de entrega dos galardóns, celebrada onte á noite no Teatro Reina Victoria de Madrid, o xurado tamén expuxo que “esta obra se consolida co paso do tempo pola súa integración na paisaxe na ondulada topografía e pola rotundidade na expresión da súa arquitectura. Unha obra que soubo transformar e permanecer no tempo como unha paisaxe construída que transformou o lugar. Unha intervención complexa, valente, innovadora, onde o alumnado segue a gozar de este carácter comunitario da vida universitaria”. A argumentación dos e das expertos sinala ademais que “estas novas construcións que se levantaron no ano 2003 axudaron á definición da natureza comunitaria da vida na universidade, mellorando a calidade de vida dos universitarios ata os nosos días. A estrutura de formigón visto no exterior, combinando a súa textura e cor coas madeiras da fachada configuran ademais ese aire atemporal do ben concibido e executado”. 

O xurado valorou preto de 200 propostas seleccionadas por colexios oficiais de arquitectos e consellos autonómicos, dentro dos seus ámbitos territoriais, nunha edición dos galardóns á que se presentaron preto de 500 obras.

Actuacións no campus vigués

A actuación desenvolvida no campus vigués por Miralles e Tagliabue EMBT, que arrancou no ano 1999 coa presentación do proxecto de urbanización e finalizou en 2003, inclúe o edificio e a praza Miralles, o centro comercial, o edificio da piscina, así como as pasarelas que os conectan, e o edificio Ernestina Otero.