DUVI

Diario da Universidade de Vigo

Un portafolio audiovisual ofrece 12 recomendacións de lecturas infantís

Contos para unha nena que non sabía ler

Foi elaborado pola alumna de Educación Primaria Évora Parcero

Etiquetas
  • Entidades Colaboradoras
  • Estudantes
  • Medios
  • PAS
  • PDI
  • Público externo
  • Ourense
  • Estudantado
  • Estudantes
DUVI Ourense 08/06/2022

A súa bisavoa Adelaida, comenta a alumna de Educación Primaria Évora Parcero, aprendeu a ler aos 34 anos, estando no cárcere durante o franquismo, e nunca puido coller un libro cando era pequena. Para esa cativa que non puido ler e para todas as rapazas e rapaces, a estudante publica agora en Internet un portafolio audiovisual de recomendacións de lectura titulado Contos para unha nena que non sabía ler.  

A iniciativa, explica Isabel Mociño, profesora da Facultade de Educación e Traballo Social do campus de Ourense, xurdiu no marco da materia de Literatura Infantil que a profesora imparte en cuarto curso do Grao de Educación Primaria. “O que lle pedía aos alumnos e alumnas era que me fixeran portafolios de lecturas recomendadas. Podían elixir o tipo de documento que quixeran facer e Évora fixo este audiovisual no que fai unha viaxe emocional recordando á súa bisavoa, que non chegou a coñecer pero que marcou a súa vida polo que oía falar dela”, comenta Mociño. A docente destaca que se trata “dun traballo precioso, cunha carga emocional enorme e cunha forma de presentar os libros fantástica". Non é, advirte, un audiovisual profesional, pois non era ese o obxectivo, pero pola súa posta en escena, pola naturalidade coa que fala a estudante e polas obras "moi ben escollidas" que recomenda a profesora indica que é moi acaído para ver e divulgar a lectura infantil en galego.   

Segundo explica Évora Parcero, cando afrontou a realización deste proxecto, tiña clara a idea de que “é moi importante aproveitar os traballos que nos mandan facer na aula para contar algo”. No seu caso, salienta, “a miña familia é fundamental, e sobre todo as raíces, a historia, que ao final acabamos esquecendo porque ou non se conta ou se oculta porque ao mellor non foi sempre todo bo”. Porén, apunta a alumna, na súa familia “por sorte, non foi así e crieime con historias dos meus antepasados, sendo clave para min na miña infancia a historia da miña bisavoa, unha muller que foi supercrítica, que viviu mal, pero que ao final naquelas experiencias malas ela sempre vía o lado positivo, vía unha aprendizaxe de situacións desfavorables”. Por este motivo, a estudante apunta que cando xurdiu a realización deste traballo de aula “tiña que falar de libros, tiña que contar unha historia e que mellor historia que a historia orixinal e fundamental que foi para min a da miña bisavoa”.

12 obras

O froito do traballo realizado é, explica a súa autora, un “vídeo documental” de algo máis dunha hora de duración no que a propia Évora Parcero vai contando a historia de vida da súa bisavoa uníndoa con distintos libros que ela lle recomendaría á súa bisavoa se ela de nena soubese ler. Ao longo de diferentes capítulos, a estudante vai presentando 12 libros, desde No corazón do bosque, de Agustín Fernández Paz, e O atlas da Galicia pequeniña, de César Lorenzo Gil e Jorge Campos, ata Somos os monstros, de Paula Carballeira, e Monte Pindo, de Laura Suárez. De cada un, a estudante amosa o libro, presenta a súa historia e fala das súas principais características e puntos fortes de interese.

O vídeo destaca tamén porque está ambientando en paraxes naturais. Neste senso a súa autora sinala que “eu son de Cangas e aproveitei para gravar no Monte Castelo porque pareceume moi importante relacionar o vídeo co medio natural xa que miña bisavoa durante toda a súa vida viviu nunha aldea rural de Ourense, sendo o medio natural importantísimo para ela”. Por último, a alumna explica que no seu caso optou por facer un portafolio audiovisual xa que, indica, “eu exprésome mellor falándolle a unha cámara que escribindo e teño a sensación que así conecto mellor co espectador”. Coa súa proposta agarda poder contribuír a fomentar a lectura infantil. “Hoxe en día dispoñemos de infinidade de opcións para elixir onde se xuntan historias de moi diversa índole e moi diverso formato. Podemos levar aos cativos a diferentes realidades, situacións, vivencias, que coñezan mellor o seu medio ou outro que nunca viron, que xoguen coa lingua a través da poesía ou dos trabalinguas, que gocen coas imaxes e cos debuxos, etc”, destaca no seu audiovisual.