Despois de 12 xornadas, o equipo masculino de baloncesto do campus continúa invicto

O Universitario Campus Ourense de baloncesto masculino continúa invicto despois de sumar esta fin de semana unha nova vitoria, a doceava desta tempada. Tamén en baloncesto, as xogadoras conseguiron rachar a súa xeira de malos resultados acadando tamén unha vitoria o sábado. Pola contra, o primeiro equipo de rugby perdeu contra Bizkaia Gernika RT e os equipos de fútbol gaélico e xadrez do campus tiveron desigual sorte nos encontros disputados.   

Dúas vitorias en baloncesto

En baloncesto, o Universitario Campus Ourense masculino gañou o sábado 50-81 a CB Tui Seta. Con este marcador o equipo mantense como líder invicto do seu grupo na primeira división masculina, con 12 vitorias e ningunha derrota. Pola súa banda, a categoría feminina gañou tamén o sábado por un axustado marcador de 55-51 a Fisiogal Centro de Fisioterapia.

Derrota en rugby

Xa en rugby, a xornada 17 de competición no grupo A da división de honra B do rugby estatal saldouse o domingo para o Campus Universitario Ourense cunha derrota fronte a Bizkaia Gernika RT por 53-30 no campo de Urbieta. Este resultado mantén aos ourensáns no terceiro posto da táboa, con nove vitorias, un empate e seis derrotas. Tamén en rugby pero xa na liga galega, a categoría masculina do club perdeu 14-12 contra Mareantes RC e a feminina gañou 45-25 a Ferrol RC.

Desigual sorte en fútbol gaélico

En fútbol gaélico, a categoría feminina do Auriense Campus da Auga FG gañou na súa visita a Independente FG. “O encontro comezou os primeiros dez minutos cun xogo moi igualado, con anotacións continuas de ambas escuadras pero a partir de aí todo cambiou. As nosas rapazas comezaron a ser claramente superiores e a impor o seu xogo, tendo grande acerto a gol”, indican desde o club. O resultado final foi Independente FG 1-12 (15)  vs 3-12 (21)  Auriense Campus da Auga FG. Pola contra, a categoría masculina perdeu o encontro disputado co primeiro equipo da liga, sendo o resultado final Estrela Vermelha FG 6-29 (47) vs 4-8 (20) Auriense Campus da Auga FG.  

Segunda xornada de liga en xadrez

Na segunda xornada da liga galega de xadrez disputada o sábado, o Universitario de Ourense perdeu na primeira división contra Xadrez Tui por 1,5-2,5, con vitoria de Manuel Álvarez, táboas de Brais Gerpe e derrotas de Manuel Vidal e Álvaro Suárez. Na segunda división, os ourensáns gañaron 3-1 contra Xadrez Forte de Monforte, con vitorias de Miguel Reza e Raúl Martínez e táboas de Marcos Reza e Adrián González. Por último, na terceira división, o equipo do campus tamén gañou 3-1 contra Celanova B, con vitorias de Julio C. Pérez , Rodrigo Arias e Alejandro Garrido e derrota de Favio Fuentes.