Dous integrantes da EXP-UVigo acadan o cuarto posto no Campionato do Mundo de xadrez para persoas cegas

Xadrecistas con discapacidade visual de 21 países participaron na localidade montenegrina de Petrovac no Campioniato do Mundo da IBCA, a asociación internacional de xadrez en braille, no que España logrou o cuarto posto. Fíxoo cunha selección da que formaba parte o integrante da Escola Xadrez Pontevedra-Universidade de Vigo David Fernández e adestrada polo tamén deportista do club universitario Daniel Rivera. O equipo español sumou cinco vitorias, dous empates e dúas derrotas nesta competición por equipos, na que Polonia alzouse co título mundial, seguida polos combinados de Ucraína e Serbia. 

Unha vitoria, catro táboas e catro derrotas foi o balance de Fernández Lago nas nove roldas dunha competición á que España acudía cun equipo que completaban Daniel Eduardo Pulvett, Roberto Clemente, Gavril Draghici e Piedad Esmeralda Sánchez.

Subcampións da División de Honra

Ademais deste mundial, nos últimos días disputábase tamén a derradeira xornada da Liga Galega de Xadrez, que o primeiro equipo do club universitario pechou como subcampión da División de Honra. O Xadrez: Estratexia pola Paz medíase nesta última rolda ao líder da máxima categoría, o Xadrez Ourense, que se proclamaba campión tras o seu empate (3-3) co equipo pontevedrés, que precisaba vencer por 6-0 para alzarse co campionato. “0 3-3 era un resultado que nos daba matematicamente o subcampionato, pero ese non era o obxectivo. A vista non estaba posta no retrovisor, senón cara adiante”, salienta o capitán, Pablo García, dun enfrontamento no que a EXP-UVigo rematou sumando tres puntos, grazas ás vitorias dos xogadores do filial David García e Bernardo Rebollo e os empates dos mestres FIDE Alberto Portela e Rubén Fernández.

Nese senso, García, destaca o “extraordinario desempeño” dos deportistas máis novos do club universitario, que contou ao longo desta tempada con “incontables baixas”, que levaron ao “axuste semanal” de todos os equipos. Pese a iso, sinala, os diferentes equipos do EXP-UVigo completaron unha destacada participación nas diferentes categorías da liga galega, co ascenso do EXP-Zona Informática na Terceira División, un descenso e “asegurando equipos en todas as categorías do xadrez galego unha tempada máis”.

Ademais, do primeiro equipo, nesta última xornada competiron tamén os tres representantes do club na Primeira División; o EXP-Concello de Pontevedra, que acadaba a salvación grazas ao seu empate e á vitoria acadada no seu mesmo grupo polo EXP-Non á violencia de xénero. Noutro dos grupos, o EXP-UVigo pechaba a liga cunha derrota.