DUVI

Logo DUVI

Diario da Universidade de Vigo

Na xornada de arranque do proxecto europeo Edify, liderado pola Universidade 

Expertos en fotónica consideran que Vigo debe converterse nun centro tecnolóxico de referencia en Europa

Etiquetas
  • Entidades Colaboradoras
  • Estudantes
  • Medios
  • PAS
  • PDI
  • Vigo
  • Congresos e xornadas
  • TIC
  • Universidade e empresa
  • Investigación
DUVI 05/12/2018

Algunhas e algúns dos máis destacados expertos en fotónica participaron este mércores na xornada de arranque do proxecto europeo Edify, liderado pola Universidade de Vigo e a empresa Smart Photonics, que ten o obxectivo de capacitar profesionais en fotónica integrada, ao abeiro das liñas de actuación do proxecto Marie Curie da axenda 2020. A xefa de marketing de Epic, consorcio que reúne a 400 empresas e universidades vinculadas coa fotónica, Auri Ripoll, foi a primeira en intervir na xornada asegurando que “Vigo ten que se converter nun centro tecnolóxico de referencia en Europa, como é Eihdhoven, en Holanda, ou Munich, en Alemaña”, asegurou. Ripoll, que explicou que a fotónica é unha tecnoloxía que liderará o futuro do vehículo autónomo, pero que hoxe xa está presente en sectores tan dispares como a agricultura, a enerxía, a saúde ou as comunicacións, incidiu na falta de persoal cualificado que existe neste ámbito. A responsable de marketing de Epic lembrou ás empresas participantes na xornada celebrada en Vigo que “a aposta da Unión Europea por esta tecnoloxía é tan forte que financian ata un 80% calquera sensor fabricado con fotónica”.

Pola súa banda, o coordinador do programa e investigador da Universidade de Vigo e subdirector de atlanTTic, Francisco Díaz, coincidiu con Ripoll no gran potencial da cidade e a súa área de influencia e salientou “as grandes oportunidades negocio xurdidas no transcurso da xornada entre as e os expertos en fotónica e as empresas, especialmente, automoción e aeroespacial”, sinalou.

Na xornada celebrada hoxe en dependencias de Zona Franca tamén participaron Ronald Broeke, director xeral de Bright Photonics; David Mackey, fundadot de mBryonics e Francisco Soares, responsable do Instituto Fraunhofer Heinrich Hertz, o centro máis relevante de Europa en telecomunicacións aplicadas. A sesión rematou cunha mesa redonda moderada polo director do proxecto Edify.