DUVI

Diario da Universidade de Vigo

No seu discurso falou de alimentos tradicionais e estándares de calidade sensorial

Francisco Javier Carballo ingresa na Academia de Ciencias Veterinarias de Castela e León

O acto celebrouse este mércores na universidade leonesa

Etiquetas
  • Medios
  • PDI
  • Ourense
  • Institucional
DUVI Ourense 21/06/2018

O Paraninfo Félix Gordón Ordás da Universidade de León acolleu este mércores o acto de incorporación de Francisco Javier Carballo, catedrático de Tecnoloxía dos Alimentos da Universidade de Vigo, como académico correspondente da Academia de Ciencias Veterinarias de Castela e León nun acto no que foi presentado polo tamén académico Carlos Alonso Quella. O profesor da Facultade de Ciencias do campus de Ourense abordou no seu discurso de ingreso cuestións como a importancia dos alimentos tradicionais e a esixencia de estándares de calidade sensorial por parte das e dos consumidores. 

Entre os méritos considerados para acadar esta distinción, desde a Universidade de León, onde Francisco Javier Carballo se licenciou e doutorou en Veterinaria, destacan en nota de prensa como “nos últimos 25 anos desenvolveu un importante labor investigador no campo da caracterización bioquímica e microbiolóxica de produtos lácteos, cárnicos e vexetais tradicionais e na posta a punto de métodos para a súa industrialización. Tamén se ocupou do estudo do efecto da alimentación porcina sobre a calidade da carne e dos produtos cárnicos elaborados”. 

No seu discurso de incorporación, titulado As ciencias veterinarias e os alimentos tradicionais: quédanos camiño por percorrer?, Francisco Javier Carballo explicou como cada civilización ten os seus propios alimentos, marcados e determinados polas materias primas dispoñibles nas súas contornas xeográficas, polas condicións ambientais reinantes e por un saber ancestral e transmitido xeracionalmente, que permite pór ás materias primas ao abrigo dos axentes de deterioración, prolongando a súa vida útil e xerando produtos absolutamente diferenciados, con personalidade, capaces de asentarse e perpetuarse a través dos milenios. Os alimentos tradicionais, subliñou o catedrático, “foron un apoio e auxilio incondicional da actividade humana, xa que permitiron a conservación das materias primas, amortecendo períodos de escaseza estacionais e cíclicos, e evitaron fames”.

Control de enfermidades 

Ao longo da súa intervención, o novo membro da Academia de Ciencias Veterinarias de Castela e León detívose a describir as enfermidades clásicas transmitidas polos alimentos, como a triquinose, a brucelose e o botulismo, así como o papel das ciencias veterinarias e dos profesionais veterinarios no seu control, e comentou que a preocupación por estas enfermidades “coexiste nas últimas décadas coa problemática exposta pola emerxencia doutros procesos de orixe microbiano, e de etioloxía diversa, tamén de transmisión alimentaria, como a listeriose, que é o proceso máis grave de entre todos os de recente estudo e aparición”. 

Francisco Javier Carballo falou tamén dos avances das ciencias médicas que permitiron identificar novas ameazas para a saúde, esta vez cunha orixe clara en determinados compoñentes químicos naturalmente presentes nos alimentos. Entre todas estas ameazas referiuse especialmente “ás representadas polo sal, pola cantidade e composición da graxa e polas aminas bióxenas presentes nos alimentos”, e describiu os estudos efectuados nas facultades de veterinaria e institutos de investigación encamiñados a substituír estes compoñentes nos alimentos tradicionais.

A intervención concluíu centrada na esixencia que fan as e os consumidores sobre a calidade sensorial dos alimentos, unha vez que se dá por feito nos países avanzados que a seguridade e salubridade alimentarias son obxectivos xa alcanzados. A este respecto Carballo apuntou que “os alimentos, á parte de ser nutritivos, sans e seguros, teñen que cumprir cos estándares de calidade sensorial máis esixentes”, e finalizou asegurando que os alimentos tradicionais “teñen que manter os seus atributos e caracteres diferenciais e os seus acenos de identidade sensorial potenciados ao máximo, de modo que se lles distinga con facilidade dos produtos de similar natureza presentes nos mercados”.