A historia das escolas impulsadas desde a emigración centra unha exposición na Vicerreitoría

Nas primeiras décadas do século XX, construíronse en Galicia máis de 250 escolas por iniciativa das sociedades de instrución, colectivos de emigrantes en América que buscaban deste xeito contribuír á mellora da educación nas súas vilas e comarcas de orixe. Pór en valor esta contribución e afondar na creación e funcionamento destes centros educativos son dous dos obxectivos da exposición Luces de alén mar. As escolas de americanos en Galicia, unha mostra promovida polo Consello da Cultura Galega e o Arquivo da Emigración de Galicia, coa colaboración da Secretaría Xeral de Emigración da Xunta, que ata o 31 de outubro pode visitarse, en horario de 9.00 a 21.00 horas, na sala de exposicións da Vicerreitoría do campus.

Unha vintena de paneis integran a mostra que desde 2013 percorre a xeografía galega e que retorna a Pontevedra, tras exhibirse por primeira vez na cidade o pasado ano, na Facultade de Ciencias da Educación e do Deporte. O vicerreitor do campus, Jorge Soto, e o director da Área de Dinamización Cultural, Educativa e Integración do campus, Manuel Morquecho, participaron este xoves na apertura dunha exposición que, sinalaron, “permítenos sobre todo ver a importante función que desenvolveu este colectivo”.

Un colectivo que creou máis de 500 sociedades de instrución

Comisariada polo profesor da Universidade de Santiago de Compostela Vicente Peña, a mostra aborda nos seus diferentes paneis o “éxodo” galego a América, o labor de “filantropía docente” dos indianos galegos e a traxectoria no asociacionismo dos emigrantes, ao mesmo tempo que pon o foco na situación na que se atopaba o ensino en Galicia a comezos do pasado século. No período que abrangue entre o ano 1904 e o inicio da Guerra Civil, en 1936, creáronse en Arxentina, Cuba, Brasil, Uruguai e Porto Rico un total de 546 sociedades de instrución, que agrupaban aos emigrantes por parroquias, concellos ou comarcas. Os fondos recadados por estes colectivos fixeron posible a construción neste período de máis de 250 escolas en moitos puntos de Galicia, nas que esta exposición se detén para afondar tanto na súa creación como na súa actividade diaria, á vez que para presentar tamén o seu enxoval, programas e textos, do mesmo xeito que tamén aborda a situación e os usos que teñen na actualidade varios destes edificios..