DUVI

Diario da Universidade de Vigo

Participan 2000 alumnos de varios países, 18 deles da EEME da UVigo

Vigo, representada no Cartel de Minas que se celebra en Albi

Trátase dun foro que ten unha importante compoñente de convivencia

Etiquetas
  • Estudantes
  • PAS
  • PDI
  • Vigo
  • Asociacións de Estudantes
  • Deportes
  • Internacional
  • Estudantes
DUVI 25/04/2019

A cidade francesa de Albi acolle a partir de hoxe xoves o Cartel de Minas, un encontro internacional no que se dan cita arredor de 2000 estudantes de Enxeñaría de Minas de escolas de Francia, España, Alemaña e Marrocos. Ao longo de tres días os deportes serán os protagonistas desta cita que ten tamén unha importante compoñente lúdica, festiva e de confraternización.

A Universidade de Vigo estará representada por un grupo de 18 estudante e ex-estudantes que están xa na cidade gala para arrincar dende hoxe esta 46ª edición do Cartel des Mines, que este ano organiza a IMT Mines Albi. Ata o domingo, compartirán pistas, canchas, campos e tamén experiencias, estudantes de todas as escolas de Minas de Francia (París, Nancy, Saint-Etienne, Douai, Nantes, Ales, Albi-Carmaux) e escolas convidadas como Vigo, Oviedo, Bochum e Emines de Benguerir. Nestes tres días mediranse en equipos e individualmente en arredor de 15 modalidades deportivas como fútbol, baloncesto, voleibol, balonmán, rugby, tenis, cross e relevos tanto de natación como de atletismo. Ademais, cada ano a organización elixe un ou varios deportes convidados, que nesta ocasión serán petanca e escalada. Ademais tamén terán lugar actividades máis enfocadas ao lecer, como un concurso de DJs e de FIFA 2019. 

Competición pero, sobre todo, convivencia

A finalidade deste evento é converterse nun foro, nun lugar de encontro no que as delegacións establezan vínculos nacionais e internacionais e estreiten lazos cos compañeiros e compañeiras doutras escolas. Por todo isto, Alicia Caamaño, presidenta do Cartel de Vigo e Lucía Nieto, unha das súas integrantes, explican que dende o punto de vista persoal, esta é unha “experiencia moi enriquecedora”. Destacan que como grupo “fortalece vínculos entre compañeiros de distintos cursos e idades que, doutra forma, non se establecerían” pero tamén, ao ser unha competición internacional, “permite coñecer a xente doutras nacionalidades e culturas que estudan o mesmo ca ti e que comparten as mesmas inquedanzas”. Ademais tamén afrontan estes días como unha “boa oportunidade para saír da zona de confort e practicar idiomas”.

No que se refire á parte estritamente deportiva, a Universidade de Vigo participará nas modalidades de baloncesto, tanto masculino coma feminino, en cross e en petanca. Recoñecen que as súas expectativas “teñen como base facelo o mellor posible, xa que a maioría das universidades participantes contan con equipos de gran nivel, e vai ser complicado traer o trofeo á nosa escola, pero por intentalo que non falte!”.