DUVI

Diario da Universidade de Vigo

A duración do abono cuadrimestral amplíase ata o 15 de febreiro de 2022

Volve o abono mUVer con acceso gratuíto e descontos nas instalacións e actividades deportivas da UVigo

Comunidade universitaria, persoas vinculadas e externas poden adquirilo desde hoxe

Etiquetas
  • Estudantes
  • Medios
  • PAS
  • PDI
  • Vigo
  • Deportes
  • Deportes
Mª del Carmen Echevarría Figueroa DUVI 22/09/2021

Acceso gratuíto ás instalacións deportivas da Universidade nos tres campus durante todo o seu horario de apertura: salas cardio - fitness, tenis de mesa, pistas de atletismo (Vigo e Ourense), pistas de tenis (Vigo e Ourense), rocódromo (Vigo) e bicicletas BTT (Vigo). Acceso gratuíto a actividades dirixidas: CORE, adestramento funcional, pilates, hiit, etc. Seguimento técnico dos programas de adestramento. E 20 % de desconto para as persoas da comunidade universitaria nas Escolas Deportivas e nas actividades puntuais no medio natural (Augaventura, Delecer e Rutas Culturais). Estas son as vantaxes que o abono mUVer outorga aos seus posuidores, sexan ou non membros da comunidade universitaria, para este curso 21-22. O abono que se pode adquirir a partir de hoxe, “funciona como un carné de socio dun centro deportivo. O básico sería o acceso ás salas de cardio-fitness dos tres campus, onde contarán con monitores e monitoras de xeito permanente que os axudarán. Ademais, o abono dá dereito ao acceso gratuíto a un amplo abano de actividades, así como descontos noutras como as Rutas culturais ou o Programa Augaventura, etc.”, explica Xavier Rial, director técnico da Área de Benestar, Saúde e Deporte da UVigo. 

O abono mUVer pode adquirirse a partir de hoxe, ben para o primeiro cuadrimestre, por 35 euros para a comunidade universitaria, 50 para outras persoas e colectivos vinculados á UVigo, e 100 euros para persoas externas á Universidade; ou ben ata o 30 de xuño de 2022 por 60 euros para membros da comunidade universitaria, 90 para outras persoas e colectivos vinculados á Universidade e 180 euros para persoas externas á institución académica. “Como este ano as actividades comezan o 1 de outubro, a duración do abono cuadrimestral amplíase ata o 15 de febreiro de 2022 en lugar de ata o 15 de xaneiro”, destaca Rial como novidade deste curso. 

Medias mensuais de persoas abonadas nos últimos cursos 

Desde a Área de Benestar, Saúde e Deporte da UVigo animan á comunidade universitaria, así como ás persoas vinculas e externas á institución, a adquirir o abono mUVer xa que, “quen teña o abono entra na dinámica de participar e estar informado nas distintas propostas que se van ir lanzando ao longo de todo o curso”, destaca o director técnico da Área.

Despois de que a pandemia frease a práctica deportiva presencial durante o segundo cuadrimestre do curso 19-20, o que se traduciu en que se aboasen ao longo dese curso unha media mensual de 980 persoas entre os tres campus, e á espera de rematar de recompilar os datos do curso 20-21, Xavier Rial agarda que neste 21-22, que acaba de comezar, se rexistre unha recuperación nas cifras de persoas aboadas ata acadar rexistros similares a antes da chegada da covid-19. “Durante o curso 18-19 houbo unha media mensual de 1588 persoas aboadas entre os tres campus”, sinala o director técnico da Área de Benestar, Saúde e Deporte da UVigo, que destaca que a distribución entre homes e mulleres foi nese curso de 59,81% homes e 40,19% mulleres e coas persoas 614 persoas aboadas no campus de Ourense á cabeza da UVigo, fronte ás 532 de Vigo e ás 443 de Pontevedra.