As Xornadas AER-UVigo apostan pola transversalidade na súa segunda edición 

Despois dunha primeira edición celebrada no ano 2020, na que os fabricantes líderes do sector da robótica industrial foron os protagonistas, as Xornadas AER-UVigo celebrarán a partir do vindeiro 12 de maio a súa segunda edición, marcada, desta volta, pola transversalidade. E é que nesta ocasión, segundo explican o docente e investigador da UVigo, José Ignacio Armesto, e o xerente de AER Automation, Alex Salvador, “respondendo á vontade de medrar, tanto no ámbito da automatización, como no da industria 4.0, convocáronse tres mesas con temáticas diversas: robótica industrial, robótica de servizo e automatización”.

As xornadas, organizadas pola Asociación Española de Robótica e Automatización e a Universidade de Vigo, celebraranse os días 12,19 e 26 de maio en formato dixital, co obxectivo de facer fincapé na necesidade imperiosa de automatizar e dixitalizar o tecido produtivo, “coa vontade de apoiar ás pemes industriais neste proceso e contribuír a situar o noso PIB industrial amplamente por riba do 20%”, explican Salvador e Armesto. Os organizadores agardan que a celebración das xornadas en formato virtual incremente o número de participantes da primeira edición, na que 250 persoas asistiron de xeito presencial. “Superar os asistentes presenciais da primeira edición vai supoñer un reto maiúsculo, aínda que a día hoxe, no evento creado a tal efecto na rede LinkedIn, inscribíronse máis de 400 persoas”, apuntan.

“Altísimo nivel” das e dos poñentes 

Preto de 20 directores e directoras xerais, comerciais ou de márketing doutros tantos asociados á entidade de referencia en España en robótica e automatización, participarán na segunda edición das xornadas que arrancarán o día 12 de maio, ás 10:00 horas, cun acto inaugural, e continuará cunha mesa redonda dedicada á robótica industrial. As sesións continuarán o 19 de maio cunha xornada, protagonizada por representantes de diferentes firmas na que se abordará a robótica de servizo, e finalizarán o 26 de maio coa derradeira mesa redonda das xornadas na que o protagonismo será para a automatización industrial.

Armesto e Salvador destacan “o altísimo nivel de todos e todas as participantes, que sen dúbida van achegar a todos os inscritos unha mirada lúcida e experta sobre como acometer con éxito os principais retos da industria 4.0. Por outra banda, desde a UVigo propuxemos para esta segunda edición das xornadas como moderadores e moderadoras destas mesas a profesionais do sector, egresados da UVigo, que traballan en centros tecnolóxicos galego de referencia Aimen, CTAG e Gradiant”, explican.