O XX Coloquio de Historia da Educación reunirá arredor de 200 especialistas de 50 universidades

Monforte de Lemos acollerá do 9 ao 12 de xullo de 2019 o XX Coloquio de Historia da Educación. Identidades, internacionalismo, pacifismo e educación (séculos XIX e XX). Este congreso internacional, coordinado desde a Facultade de Ciencias da Educación do campus de Ourense, está organizado pola Sociedade Española de Historia da Educación, as tres universidades galegas e as universidades de Lisboa, Florencia e Santa Catarina do Sul.

A cita foi presentada este martes en Monforte de Lemos. No acto, Uxío Otero, profesor do campus de Lugo e presidente da Sociedade Española de Historia da Educación, subliñou a importancia destes coloquios e o papel que está a desenvolver a entidade que preside na investigación histórico-educativa. Pola súa banda, Xosé Manuel Cid, vicedecano da Facultade de Ciencias da Educación ourensá e presidente do comité organizador do coloquio, adiantou, xunto á tamén profesora do centro María Victoria Carrera, as liñas xerais que marcarán o congreso, do que destacou como se agarda “a participación de 200 especialistas, representando a máis de 50 universidades”. Por último, José Tomé, alcalde de Monforte de Lemos, resaltou o que significa para esta localidade a celebración deste evento científico internacional o próximo verán.

Tres eixes temáticos

A Sociedade Española de Historia da Educación, lembrouse na presentación, encargou ás universidades galegas a organización deste XX coloquio, un foro de debate iniciado en 1982 e que xa foi organizado polas universidades galegas na súa sexta edición, no ano 1990. A programación da edición a 2019, explicouse no acto celebrado este martes en Monforte de Lemos, articúlase en tres amplas seccións que corresponden aos tres tópicos fundamentais da cita, como son identidades, internacionalismo e pacifismo. O prazo para presentar propostas está aberto para talleres e simposios ata o 25 de outubro e ata o 25 de novembro para a presentación de comunicacións.

Sobre a relevancia destes tres eixes propostos, desde a organización da cita sinalan como na construción e desenvolvemento histórico dos sistemas educativos interviñeron factores e motivacións culturais, políticas, relixiosas, idiomáticas, económicas, etc. Algúns destes factores, engaden, apuntan á cuestión das identidades por unha banda e por outra ao internacionalismo. Ademais, lembran, na segunda metade do século XX, co convencemento da necesidade de construír sociedades pacíficas, naceu unha crecente rede de institucións e servizos desde onde se veu propiciando a cooperación internacional, o que se traduciu nunha ollada progresivamente transnacional ao desenvolvemento educativo. “As identidades, o internacionalismo e o pacifismo propiciaron diversos e a miúdo contrapostos exercicios, prácticas e experiencias que merece a pena revisar criticamente”, recalcan desde o comité organizador do coloquio sobre a relevancia dos contidos que se abordarán na súa vinte edición.