17 de maio
Día das Letras Galegas
O galego, lingua da sostibilidade
O Día das Letras Galegas rende homenaxe este ano a Antonio Fraguas pola súa defensa da lingua como idioma de expresión válido para tratar calquera ámbito de coñecemento e pola coherencia do seu percorrido vital a prol da cultura galega.
A defensa da cultura galega baixo o prisma da Axenda 2030
O cuarto Obxectivo de Desenvolvemento Sostible (ODS 4) da Axenda 2030 persegue garantir unha educación inclusiva e equitativa de calidade e promover oportunidades de aprendizaxe permanente para todas as persoas.
Se ben este obxectivo se focaliza na educación como medio para reducir as desigualdades e fomentar a tolerancia e a creación de sociedades máis pacíficas, na meta 4.7 establécese explicitamente que o estudantado debe adquirir os coñecementos teóricos e prácticos necesarios para promover e valorar a diversidade cultural e a contribución da cultura ao desenvolvemento sostible.
A Axenda 2030 desborda o principio meramente ambiental e económico recoñecendo a cultura como un elemento nuclear para acadar sociedades máis sostibles. A sostibilidade do planeta pasa, xa que logo, pola protección do medioambiente, pola redución das desigualdades, por un progreso harmónico e pola xeración de alianzas robustas, mais tamén pola defensa da diversidade lingüística e cultural.
Dende Galicia debemos contribuír ao desenvolvemento sostible apelando ao valor da diversidade cultural e do plurilingüísmo a través da protección e promoción do noso idioma. Apoiando e normalizando a lingua galega contribuímos a facer un mundo máis sostible e inclusivo, ademais de participar na construción dunha Europa, e por extensión dun mundo, baseada nos principios da non discriminación e da igualdade de todas as persoas.
Neste sentido, a Universidade de Vigo conta coa Área de Normalización Lingüística que ten como principal misión protexer, promover e dinamizar o uso da lingua galega dentro da comunidade universitaria.
Máis información:
Área de Normalización Lingüística
+34 986 813 574
anl@uvigo.gal
Área de Responsabilidade Social e Cooperación
Vicerreitoría de Responsabilidade Social, Internacionalización e Cooperación
+34 986 813 587
direc.rsco@uvigo.gal