Diario da Universidade de Vigo
A cita arrancou este xoves co alumnado de ESO e continuará mañá con FP e bacharelato
300 estudantes de ensino medio presumen de ‘enxeño tecnolóxico’ na II Olimpíada de Teleco
Presentaron múltiples prototipos e solucións creativas para problemas relacionados co ODS 3: Saúde
Un dos equipos participantes co seu prototipo
Acto de benvida no salón de actos da escola
Equipo do CPI Luis Díaz Moreno de Baralla en Lugo
Detalle do prototio de ecoaula
Os membros do xurado nun dos postos instalados no corredor principal da escola
A directora da escola, Rebeca Díaz, dándolles a benvida acompañada por outros docentes do equipo directivo e representantes de Indra
Alumnas do colexio plurilingüe María Auxiliadora Salesianos Ourense
Un dos equipos presentando o seu proxecto ante o xurado
A exposición dos proxectos nos postos do corredor tamén foi bo momento para resolver dúbidas
Hoxe foi a quenda do alumnado de ESO, mañá venres participarán os de FP e Bacharelato
O corredor da escola encheuse de postos nos os equipos amosaron publicamente as súas propostas
Preto de 300 estudantes de medio cento de institutos de ensino secundario de toda Galicia participan desde este xoves e ata o vindeiro sábado na Escola de Enxeñaría de Telecomunicación na II Olimpíada Nacional de Teleco, unha cita na que se reta ás alumnas e alumnos de Ensino Secundario Obrigatorio, Bacharelato e Formación Profesional a pór a proba o seu enxeño tecnolóxico deseñando prototipos e solucións creativas cos que poder axudar a resolver algúns dos problemas aos que se enfronta a sociedade actual, neste caso vinculados co ODS 3 da Axenda 2030: saúde e benestar.
Nesta primeira xornada da competición participan 172 estudantes de ESO de 23 centros educativos de toda Galicia, mañá venres farano 109 estudantes de FP e Bacharelato e o sábado, xa a nivel individual, cinco estudantes de 2º de bacharelato.
Divididos en equipos, foron presentando os seus proxectos, primeiro ante o xurado e, posteriormente, ante o público nos diferentes postos instalados nos corredores da escola. En ambos casos, público especializado e comunidade universitaria en xeral, non deixaron de amosar a súa sorpresa pola calidade, creatividade e innovación da maior parte dos proxectos que agora, tras varios meses de intenso traballo nos institutos, saen a relucir.
Tecnoloxía variada coa que gañar saúde e benestar
Á súa chegada á escola déronlles a benvida a directora do centro Rebeca Díaz e parte do seu equipo, así como dous representantes da empresa Indra, entidade patrocinadora dos premios na categoría de ESO. Os exemplos dos traballos que se foron presentando son múltiples. Desde o CPI Luis Díaz Moreno de Baralla en Lugo amosaron a súa particular ecoclase, “unha aula na que cando a temperatura sexa elevada se encenda de maneira automática un ventilador ou que, cando alguén se sinta mal, poida premer un botón que avisa directamente á enfermaría”. Pola súa banda, o equipo do colexio San Miguel 2 de Vigo, explicou con entusiasmo en que consiste o seu ‘pastilleiro electrónico’, “un proxecto co que queremos mellorar a vida das persoas maiores e dependentes”.
No caso dun equipo de alumnas do colexio plurilingüe María Auxiliadora Salesianos Ourense deseñaron o que denominaron un “ VentilaGym, un sistema de ventilación para espazos pechados aplicado, neste caso, a un ximnasio”. Desde o IES Rosais de Vigo optaron por deseñar unha aula dotada de diferente equipamento técnico, “incluído un medidor de CO2, outro de humidade e outro de temperatura e, dependendo de si está ou non dentro dos valores que nós escollemos, abriranse as ventás ou prenderanse os ventiladores”. Son só algún dos exemplos dos múltiples traballos que se foron presentando ao longo de toda a mañá.
3500 euros en premios financiados por empresas de conexionTeleco
Tras as presentacións, a xornada rematará coa entrega de premios correspondentes á categoría de alumnado da ESO: 400 euros para o equipo coa mellor solución técnica e outros 400 € para o seu instituto, 300 € para o equipo coa proposta máis orixinal e 200 € para o grupo que presente a solución tecnolóxica máis aliñada co ODS 3.
O financiamento destes premios chega da man de catro das empresas de conexionTeleco, a rede de compañías que colaboran de xeito habitual coa escola. Nesta caso trátase da Cátedra Indra, Cátedra R, BorgWarner e Televés. “Elas son as que nos axudan coa compra do material para os equipos que participan na competición e, a maiores, dan os premios da fase galega”, explica a directora da escola.
No caso dos premios individuais para alumnado de 2º de Bacharelato, novidade deste ano, haberá un primeiro premio de 400 euros, un segundo de 300 e un terceiro de 200.
Final nacional o mes de maio en liña
As Olimpíadas Nacionais de Teleco puxéronse en marcha o curso pasado a nivel nacional da man de 20 escolas de enxeñería de telecomunicación de toda España -25 nesta edición- e do Colegio Oficial de Ingenieros Técnicos de Telecomunicación como unha iniciativa coa que contribuír a espertar vocacións científico-tecnolóxicas, promocionar os estudos de telecomunicación, a cultura científica, a tecnoloxía e a innovación.
Ao igual que na súa primeira edición, a Olimpíada Nacional de Teleco desenvólvese en dúas fases: unha galega, a que se celebra esta semana na EET da UVigo, e outra nacional, na que competirán os proxectos gañadores das distintas competicións locais. Será o vindeiro mes de maio nunha final en liña nunha data pendente aínda de determinar.