O seu decano considera imprescindible “facerse ver” no maior escaparate da produción cultural galega
CCSS e da Comunicación exhibe o seu ben máis prezado en Culturgal
O momento actual fai máis necesario que nunca un esforzo por mostrar á sociedade “o que son capaces de facer os nosos alumnos e alumnas”. Así, por segundo ano consecutivo a Facultade de Ciencias Sociais e da Comunicación ensina o seu ben máis prezado en Culturgal, o maior escaparate actual da produción cultural galega dispondo dun espazo expositor para exhibir os traballos publicitarios e audiovisuais dos seus estudantes, ademais de dar a coñecer o perfil das titulacións impartidas no centro. “Nunha feira da cultura tamén ten que estar a formación”, salientou o decano, Juan Manuel Corbacho, tras a visita ao stand do conselleiro de Educación e Cultura en funcións, Jesús Vázquez, do alcalde pontevedrés, Fernández Lores e do secretario xeral de Cultura, Anxo Lorenzo.
Culturgal convértese no máis importante punto de encontro entre profesionais do sector da cultura a nivel autonómico dada a presenza das principais empresas audiovisuais, editoras e de comunicación, “polo que resulta obvio estar aquí cando somos os responsables de formar á xente que logo vai traballar para elas”, advertiu Corbacho que tamén salientou a idoneidade do ambiente e do espazo para crear novas sinerxías e colaboracións con outros organismos e entes.
Ademais de que o público obxectivo do stand da facultade sexan os asistentes e os propios profesionais que participan na feira, con esta presenza tamén se busca pór de relevancia “que a Universidade de Vigo a través deste campus forma parte desta cidade”, engadiu o decano, de aí que se deseñara toda unha estratexia de difusión e proxección dos graos e mestrados que se imparten no centro. “Outro dos nosos propósito é ser vistos e que a cidadanía saiba que somos unha facultade de comunicación con tres titulacións e tres mestrados, cunha visibilidade que queremos que vaia en aumento”, manifestou o decano, que lembrou ademais a colaboración directa con Culturgal con alumnado facendo prácticas de relacións públicas na propia feira.