Ceaga lanza na Escola de Enxeñería Industrial un proxecto piloto co que atraer talento universitario ao sector da automoción

Captar talento universitario. Esta é a idea coa que o Clúster da Automoción e Mobilidade de Galicia, Ceaga, presentou este  martes na Escola de Enxeñería Industrial Talent Race, un proxecto piloto ideado para atraer talento das universidades e centros de formación profesional ás empresas deste sector. A presentación levouse a cabo no salón de actos da sede campus da escola nun acto que contou coa participación, entre outros, do xerente de Ceaga, Alberto Cominges; o director da escola, José Fariña, e o ex-director, Juan E. Pardo.

Tal e como se explicou durante o acto, a iniciativa busca conectar a industria da automoción e mobilidade co talento a través da resolución de retos mediante unha plataforma posta en marcha en colaboración con outros clústeres da automoción nacionais e financiada polo Ministerio de Industria, Comercio e Turismo, a través do programa de Agrupacións Empresariais Innovadoras. A través desta plataforma, 14 empresas de Ceaga (Borgwarner, Benteler, GKN Driviline Vigo, Plastic Omnium, Denso...) presentan retos reais da industria para que as alumnas e os alumnos propoñan solucións, dándose así a coñecer no ecosistema da automoción e a mobilidade, podendo compartir espazos con profesionais, visitar empresas e acceder a diferentes oportunidades de prácticas e emprego.

Premios para as mellores propostas

Nesta fase piloto o proxecto está focalizado no alumnado universitario de carreiras técnicas, preferiblemente do último ano de grao ou de mestrado. Unha vez presentadas as propostas un xurado profesional será o encargado de analizar as respostas e elixir as mellores ideas, que optarán a diferentes premios. 

Entre os galardóns inclúese a asistencia ao evento internacional CES Las Vegas, que se celebrará do 7 ao 10 de xaneiro de 2025 e no que se darán a coñecer as principais innovacións no sector. Tamén a participación no Programa Avanzado en Management, impartido pola prestixiosa escola de negocios IE Business School, enfocado a este sector e que se levará a cabo de setembro a decembro deste ano  ou, como terceira opción, a asistencia ao evento que se celebrará no circuíto Montmeló de Barcelona o vindeiro 25 de outubro, no que se exporán prototipos de equipos de competición e no que se congregarán estudantes e empresas vinculadas ao mundo da automoción.

Envío de ideas ata o 10 xullo

O alumnado interesado en participar ten de prazo ata o vindeiro 10 de xullo para inscribirse na plataforma e responder aos retos propostos. Será, tal e como se lles explicou no acto, toda unha oportunidade para demostrar a súa valía e, ao tempo, abrir portas á realidade empresarial nun sector estratéxico para Galicia.