A CIG sae reforzada das eleccións do PDI funcionario e laboral

O paso polas urnas do Persoal Docente de Investigador este mércores deixou un claro vencedor, a Conferencia Intersindical Galega, que foi a forza máis votada tanto na Xunta de PDI como nos Comités de Empresa de Ourense e Pontevedra, confirmándose como a forza sindical maioritaria tanto entre o PDI funcionario como no laboral.
Os 1783 docentes e investigadores que compoñen o censo electoral elixiron aos 21 membros da Xunta de PDI e aos 9 do Comité de Empresa de Ourense e os 17 do de Pontevedra.

Xunta de PDI

A CIG, con 117 votos, e AGPTU, con 105, acadaron 6 representantes cada un na Xunta de PDI, sendo as dúas principais forzas sindicais entre os funcionarios. Aos seus 12 representantes hai que engadir os 4 de UGT, con 67 votos; os 3 de CSIF, con 54 votos; e os 2 de CCOO, con 45. A porcentaxe de participación foi do 44,72% neste sector, cun total de 415 votos emitidos.

Comité de empresa de Pontevedra

Entre o PDI laboral da provincia de Pontevedra a CIG deu un salto importante, pasando dos 3 representantes no Comité de Empresa a 8, con 66 votos. Por detrás, con 42 votos, a UGT sitúase con 5 delegados e CCOO con 38 votos, con 4. A porcentaxe de participación foi do 24,33%.

Comité de empresa de Ourense

Aínda que non tan contundente, a CIG colleitou un resultado moi positivo que confirma o seu avance en Ourense, pasando de 2 a 4 representantes no Comité de Empresa grazas aos 42 votos acadados. A UGT é a segunda forza con 3 delegados froito dos 36 votos recabados, mentres que CCOO obtivo 28 votos que se traducen en 2 delegados. A participación neste sector foi do 50,90%.