O Consello de Campus comeza unha nova etapa centrada na dinamización e a participación

Frutífero e moi positivo. Ese foi o balance do novo Consello de Campus de Ourense, que quedou hoxe constituído e que abordou na súa primeira sesión dúas directrices que marcarán o devir do campus nos vindeiros anos: a colaboración entre todos os membros da comunidade universitaria e o Campus da Auga. Nesta nova etapa, o Consello de Campus apostará por unha “dinamización renovada de participación” con novas metodoloxías de traballo que, ademais de involucrar aos decanos e representantes do estudantado, tamén se abrirán ás delegacións de alumnos e aos administradores dos centros. “Queremos escoitar os problemas que plantexa a comunidade universitaria para poder atendela axeitadamente. E estamos tendo unha moi boa acollida”, salientou Virxilio Rodríguez, Vicerreitor do campus ourensán.

Para conseguir esa ampla participación xa se aprobaron nesta primeira xuntanza o nomeamento de varias comisións de avaliación e das comisións permanentes de Cultura e Deporte e do Campus conVida, que manterá a súa actividade pero na que se aplicará un cambio de denominación.

O Campus da Auga, integrado na estrutura da Vicerreitoría

Dez meses despois de recibir o selo de campus especializado, o Campus da Auga comeza a dar pasos significativos no seu desenvolvemento mentres espera á sinatura do convenio económico coa Xunta de Galicia. Un deses primeiros pasos é en cuestións de gobernanza coa súa integración a partir de agora na estrutura da Vicerreitoría a través dunha comisión de dirección técnica que irá marcando as accións do plan estratéxico, tanto a nivel académicas como de investigación.

Por unha banda, dous clusters xa están a traballar nun proxecto co que o Campus da Auga poida concorrer a unha convocatoria europea centrado nos ‘ríos como camiños de auga’. “Están a ver a mellor metodoloxía de traballo para aplicala ao resto dos investigadores involucrados e pór en marcha esta fábrica de proxectos”, como destacou o reitor da Universidade de Vigo, Salustiano Mato. Ademais, en breve constituirase unha unidade de investigación e transferencia entre a Universidade de Vigo e a Confederación de Empresarios de Ourense.

Dende o punto de vista académico, estase a traballar co Instituto Politécnico do Porto e a Universidad de Tràs Os Montes y Alto Douro en “alianzas estratéxicas” en cuestións como turismo, termalismo e alimentación para tratar de conseguir dobres títulos e tamén se está a desenvolver un programa de doutoramento de marco internacional “que faga de paraugas para toda esta oferta académica do campus arredor da auga”, explicou Mato.

Neste sentido, a visita da delegación do Campus da Auga á feira de Termatalia, en Arxentina, deu moitos froitos. Ademais de atopar “vías de entendemento” para asinar convenios marco e de intercambio de estudantes coa Universidad de Santiago del Estero, a Universidad Católica de Santiago del Estero, a Universidad de Tucumán, a Universidad de Santiago de Chile, o Instituto Tecnológico de Costa Rica e o Instituto Politécnico Nacional-Escuela Superior de Turismo de México, na viaxe sentáronse os alicerces para un “traballo conxunto” coa Universidad de Buenos Aires e a Universidad La Matanza, coas que se están a buscar puntos de interese comúns de cara ao futuro, como “os problemas ambientais do acuífero guaraní, a desertización do sur do país ou a contaminación das augas fluviais”, segundo asegurou o Vicerreitor.