Conta atrás para a toma de posesión de Manuel Reigosa como sexto reitor da Universidade de Vigo 

Restan pouco menos de 48 horas para que a Universidade de Vigo teña un novo reitor, Manuel Reigosa Roger, o sexto na historia da institución académica e que sucederá a Salustiano Mato, que deixa o cargo tras dúas lexislaturas consecutivas. Ás 12.00 horas do venres 8 de xuño comezará no salón de actos da Facultade de Ciencias Económicas e Empresariais o acto de toma de posesión no que Reigosa prometerá o seu cargo, ao igual que o farán as e os integrantes do seu equipo de goberno, integrado por 11 vicerreitoras e vicerreitores e un secretario xeral. 

O acto, que presidirá Alberto Núñez Feijóo e ao que está prevista a asistencia dunha ampla representación de responsables dos ámbitos político, económico, social e académico. iniciarase co discurso do reitor en funcións, Salustiano Mato. De seguido, a secretaria xeral en funcións, Gloria Pena, dará lectura ao decreto de nomeamento do novo reitor, que de pé prometerá o seu cargo. A continuación, Mato fará entrega da medalla de reitor e do bastón de mando ao seu sucesor no cargo, que tomará a palabra para pronunciar o seu discurso.

Finalizada a súa intervención, o xa novo reitor dará conta do nomeamento de Miguel Ángel Michinel como secretario xeral, quen xurará ou prometerá o seu cargo e procederá a dar lectura do nomeamento das e dos novos vicerreitores, que a súa vez xurarán ou prometerán os seus cargos. Así, a profesora titular do Departamento de Bioloxía Vexetal e Ciencias do Solo María Esther de Blas, será nomeada vicerreitora do campus de Ourense; Jorge Soto, profesor do Departamento de Análise e Intervención Psicosocioeducativa, vicerreitor do campus de Pontevedra; Consuelo Pérez, profesora do Departamento de Enxeñaría dos Materiais, Mecánica Aplicada e Construción, vicerreitora de Transferencia; o catedrático do Departamento de Enxeñaría Mecánica, Máquinas e Motores Térmicos e Fluídos José Luis Míguez Tabarés, vicerreitor de Planificación e Sostibilidade; a docente do Departamento de Comunicación Audiovisual e Publicidade Mónica Valderrama, vicerreitora de Comunicación e Relacións Institucionais; o docente do Departamento de Fundamentos da Análise Económica e Historia e Institucións Académica José María Martín Moreno, vicerreitor de Economía; a docente do Departamento de Enxeñaría dos Recursos Naturais e Medio Ambiente Natalia Caparrini, vicerreitora de Captación de Alumnado, Estudantes e Extensión Universitaria; o docente do Departamento de Enxeñaría Telemática Manuel Ramos, vicerreitor de Organización Académica; a catedrática do Departamento de Xeociencias Mariñas e Ordenación do Territorio Belén Rubio, vicerreitora de Investigación; o catedrático do Departamento de Química Analítica e Alimentaria Jesús Simal, vicerreitor de Internacionalización e a docente do Departamento de Didáctica, Organización Escolar  e Métodos de Investigación, María Isabel Doval, vicerreitora de Responsabilidade Social, Igualdade e Cooperación.

Rematados os xuramentos das e dos integrantes do novo equipo de goberno, o presidente da Xunta, Alberto Núñez Feijóo, pronunciará o seu discurso, tralo que o coro da Universidade interpretará o Gaudeamus Igitur, co que rematará o acto.