Coa inauguración da exposición dos proxectos finais do Máster en Creación e Investigación en Belas A
A creación artística confírmase como unha boa vía de investigación
Dende a facultade experimentan un novo modelo científico a partir da propia obra de arte
As achegas científicas soen presentarse como longos estudos con centos e centos de follas. Agora ben, dende o Máster en Creación e Investigación da Facultade de Belas Artes están a experimentar un novo modelo de investigación a partir do propio acto do creador artístico, que tivo como resultado a exposición Traballos Fin de Máster 2011, inaugurada este mércores 1 de xuño. Unha selección de 22 obras deseñadas polos alumnado da primeira promoción do mestrado, “resultados dun dilatado proceso de investigación e non meros caprichos circenses”, comentou o profesor Juan Fernando De Laiglesia, un dos comisarios da mostra.
Como explicou Nono Bandera, director do mestrado, “dende que se empezaron a facer os programas de doutoramento hai 30 anos para as escolas de Belas Artes, tivemos que asumir modelos de investigación doutras áreas de coñecemento, como da socioloxía, da filosofía ou da historia da arte”, polo que a facultade, co novo mestrado, pretende abrir unha nova vía de investigación a partir da propia práctica artística, “creando novas propostas de investigación moi singulares e persoais”. Trátase, en definitiva, de xerar coñecemento “máis atento aos procesos que aos meros produtos”, engadiu De Laiglesia.
Comentaron ademais que o proceso de investigación non se culmina se non se dá a coñecer. “Débese sacar o resultado ao espazo público”, de aí a orixe da exposición e da defensa pública que os artistas deberán facer ante un tribunal avaliador “unindo obra con texto escrito”.