Diario da Universidade de Vigo
O prazo de preinscrición xa está aberto
Un curso da Aula Tecnolóxica amosará as claves da creación de tipografías dixitais
Os nosos ollos tropezan con elas en innumerables ocasións ao longo do día e, sen embargo, a maioría das veces, pasan desapercibidas. Pero, a tipografía, lonxe de ser unha mera ferramenta é un dos campos máis apaixonantes do deseño que nas últimas décadas vive a súa adaptación aos contornos dixitais. Ese será o tema central do curso Deseño tipográfico: introdución á creación de tipografía dixital da Aula Tecnolóxica, para o que xa está aberto o prazo de preinscrición.
O curso estará integrado por unha parte práctica na que, como explica o profesor Marcos Dopico, “se debuxarán as letras manualmente para despois dixitalizalas e convertilas en arquivos aplicables a todas as plataformas”, pero tamén se atenderán a certas cuestións teóricas “que se aplicarán na creación da tipografía”. Dopico explica que, aínda que o curso é moi especializado porque “dentro do deseño gráfico a tipografía actúa autonomamente”, pode resultar moi interesante para alumnos de titulacións como Belas Artes ou Comunicación Audiovisual.
Entre os contidos que configuran o seminario está unha viaxe pola historia da tipografía moderna, o estudo das clasificacións tipográficas e o coñecemento das partes dunha letra, ademais dunha introdución ás diferentes metodoloxías de debuxo e os coñecementos básicos para o emprego de FontLab 5.0 como software de creación de tipografía.