Dous novos bronces nos campionatos de España universitarios de esgrima e voleibol

Tras os éxitos da fin de semana nos campionatos de España de atletismo e judo, o deporte vigués segue a sumar medallas. Desta volta, onte mércores subía outra medalla ao marcador da Universidade de Vigo, desta volta un bronce no CEU de Esgrima que se celebrou en Almería. A deportista artífice do logro foi a estudante no grao de Ciencias da Educación e do Deporte de Pontevedra, Xiana Pérez Ogando na modalidade de florete.

Ademais, tamén durante este mércores o equipo universitario vigués de voleibol masculino obtivo por primeira vez na historia da Universidade unha medalla de bronce na fase final do campionato de España universitario que remata hoxe en Málaga. Foi precisamente ante Málaga con quen se obtivo o metal nun partido emocionantísimo no que despois de ir vencendo por dous sets a cero, Málaga acadou o empate a dous sets e forzou a disputa do quinto e definitivo, onde os vigueses impuxeron a súa calidade e obtiveron un resultado histórico.