Da man de membros da compañía A Navalla Suiza, dedicada a solucións de comunicación para Internet
Emprendedores galegos exporán no campus a súa experiencia no mundo empresarial
O evento está organizado polo grupo Iniciador e quere fomentar o autoemprego
A Navalla Suiza é unha empresa coruñesa fundada no ano 2008 que dedica a súa actividade a asesorar e desenvolver solucións de comunicación en Internet. A compañía puxérona en marcha cinco emprendedores “porque pensamos que había un espazo no panorama empresarial galego para facer un modelo de webs cunha calidade de deseño e de xestión que era necesaria”, segundo explica Berto Yáñez, coordinador do grupo. Dous representantes da empresa, o propio Yáñez e o programador Álvaro Gómez visitarán este venres a Escola Superior de Enxeñería Informática para explicarlles aos asistentes a súa andaina no mundo empresarial. A iniciativa está organizada polo movemento Iniciador, unha comunidade de emprendedores que ten por obxectivo fomentar o autoemprego a través de actividades de formación onde empresarios con compañías xa consolidadas axuden, asesoren e animen a todas aquelas persoas que teñen unha idea de negocio e pensen en dar o salto ao mundo empresarial.
Trala exposición dos membros de A Navalla Suiza os asistentes ao encontro terán a oportunidade de coñecerse e comentar os seus plans de negocio, algo moi valorado polo director da escola. Segundo explica, “neste tipo de encontros transmítese unha cultura de compartir ideas moi importante e deles poden xurdir novos equipos de traballo con novas posibilidades de negocio”, conclúe.
Galicia, terra de emprendedores pero non de cooperación
Na súa intervención este venres os poñentes falarán do camiño que tiveron que percorrer para montar a súa propia empresa e farán tamén “unha pequena crítica ao propio concepto de emprendedor tal e como se entende tradicionalmente e no que priman as estratexias individualistas e cooperativas”. Neste senso Berto Yáñez asegura que Galicia é unha terra de emprendedores, pero non unha terra de cooperación. Nas súas palabras, “somos moi individualistas e ese modelo xa non funciona porque o novo modelo económico baséase na cooperación para poder competir”, declara. Á hora de falar da súa experiencia como empresarios asegura que a ilusión por crear o seu propio negocio foi determinante á hora de superar os atrancos, aínda que recoñece que sempre hai riscos “e nos primeiros tempos hai que manter actividades paralelas para poder sacar suficiente volume de ingresos”, declara. E failles unha única recomendación a todas aquelas persoas que estean pensando en montar a súa propia empresa. “Que fagan cousas con calidade”, afirma.A Escola Superior de Enxeñería Informática é un dos patrocinadores da iniciativa
A Escola Superior de Enxeñería Informática é un dos organismos patrocinadores do proxecto Iniciador Galicia. O seu director, Enrique Barreiro, explica que este apoio vén dado pola importancia de apoiar iniciativas que promovan o espírito emprendedor en Ourense e en toda Galicia. Segundo explica, “hai estudos que sinalan que o setenta por cento do alumnado ten como obxectivo ser funcionario e un país necesita de persoas que emprendan, que poñan en marcha ideas e que creen riqueza”, subliña. A actividade do venres está dirixida non só aos membros da comunidade universitaria se non tamén ao público en xeral. Con todo, Enrique Barreiro subliña a importancia do evento para o alumnado universitario. “Neste encontro os estudantes non van aprender conceptos, nin linguaxes de programación nin tampouco arquitecturas tecnolóxicas se non que van ver actitudes emprendedoras e de iniciativa empresarial”.Trala exposición dos membros de A Navalla Suiza os asistentes ao encontro terán a oportunidade de coñecerse e comentar os seus plans de negocio, algo moi valorado polo director da escola. Segundo explica, “neste tipo de encontros transmítese unha cultura de compartir ideas moi importante e deles poden xurdir novos equipos de traballo con novas posibilidades de negocio”, conclúe.