O ex reitor e profesor José Antonio Rodríguez recolle unha medalla "gañada en equipo"

Un "profesor de química normal" que fixo as actuacións pertinentes, pero "recoñezo que non todas as que debería". Con estas verbas comezaba José Antonio Rodríguez Vázquez o seu discurso de agradecemento tras recibir de mans de José María Franco a medalla 'Amigos Distinguidos' que outorga a Asociación de Antigos Alumnos da Universidade de Vigo para homenaxear a persoas que axudaron a potenciar o desenvolvemento e a calidade tanto da comunidade universitaria como da propia asociación.

Nun acto emotivo no que sobraron palabras de agarimo para o homenaxeado, Rodríguez Vázquez, profesor e reitor da Universidade entre 1994 e 1998, non quixo esquecerse de dedicarlle un anaco da medalla a aquelas persoas "implicadas co progreso e que loitan por conseguir unha universidade moderna, aberta e comprometida coa contorna, capaces de contribuir cun mellor desenvolvemento económico e social da Universidade". Para o docente de Química, o orgullo "de pertencer á comunidade universitaria" ten que abanderarse sobre todo unha vez rematada a vida de estudante, xa que "a universidade é o verdadeiro motor das infraestructuras económicas de Galicia". A outra parte do galardón foi para os que o rodearon en todos estes anos, familia e compañeiros, porque "todo o que conseguín é froito do traballo en equipo".

Académico "integral e promotor dende os seus tempos de reitor", no seu haber figura unha extensa traxectoria con máis de 80 libros, 130 conferencias ou 25 proxectos de investigación que avalan o seu gran quefacer polo mundo universitario. A través do relatorio Don Antonio Casares y Rodrigo: paradigma histórico de los químicos gallegos, o presidente da Real Academia de Medicina e Cirurxía de Galicia, José Carro, aproveitou a oportunidade para facer "unha dualidade profesional entre ambos químicos, sempre moi activos".

Os fillos pródigos

A aposta polos egresados é fundamental segundo o reitor da Universidade, Salustiano Mato, "xa que a cooperación intelixente non depende de recursos físicos nin cuantitativos". O azar quixo que o antigo reitor e o actual coincidiran en distintos ámbitos e momentos ao longo dos 20 anos de historia da Universidade, dúas décadas nas que o campus deu pasos de xigante e conseguíu entrar no clube europeo "grazas ao traballo dos que me precederon porque a foto non debe de ser fixa e a valoración das persoas ten que ser dinámica, facerse a través da súa traxectoria".

Para aunar todas as forzas dos que nalgún momento estudaron no campus, a Asociación de Antigos Alumnos creouse en 1997 porque "a Universidade sen amigos faise peor", como asegurou o seu vicepresidente, José Luis Vázquez López. "A Universidade é a esperanza e para iso hai que fidelizar aos egresados e incorporalos ás tarefas locais, rexionais e nacionais porque son órganos de comunicación imprescindibles que asumen a interlocución para que a Universidade se manteña preto da sociedade", como salientou o presidente da asociación, José María Franco.