Defenden a capacidade do cine e da televisión como dinamizadores do sector turístico
Un grupo de investigadores do campus de Ourense traballa nun modelo que permita atraer rodaxes a Galicia
A publicidade dunha película equivale a un anuncio visto por 72 millóns de espectadores
O cine contribúe a potenciar o turismo dunha determinada rexión ou país. Así o cren un grupo de investigadores da Facultade de Ciencias Empresariais e Turismo do campus de Ourense que están a estudar o mercado do turismo cinematográfico co obxectivo de propor un modelo de aproveitamento das rodaxes en Galicia para a promoción e xeración de imaxe turística. O equipo está coordinado polo profesor José Antonio Fraiz, que defende a capacidade dos medios audiovisuais como dinamizadores do sector turístico. “A publicidade que ofrece unha película a unha cidade, provincia ou país que lle serviu de escenario equivale a un anuncio visto por 72 millóns de espectadores”, asegura ao tempo que cita como exemplo a labor desenvolvida neste campo por cidades como Barcelona cuxa identidade se transmite en películas como Todo sobre mi madre, El perfume e La Barcelona de los Erasmus, entre outras. “Pero é que ademais ofrece uns resultados económicos moi importantes para o lugar”, continúa dicindo Fraiz, unha afirmación que exemplifica co dato real da película Alatriste que deixou tres millóns de euros en Andalucía e coa triloxía El señor de los anillos, que se proxectou en 10.000 pantallas de todo o mundo e que conseguiu 100 millóns de espectadores, “uns datos que repercutiron moi positivamente sobre o turismo de Nova Zelanda”, explica o investigador.
Resultados a finais do 2012
O equipo de investigadores que coordina Fraiz Brea está integrado polos profesores María Lorena Rodríguez, María Cruz del Río, Ana Pérez, Ángel Barajas e Trinidad Domínguez e o seu obxectivo é determinar cal é o mellor modelo a implantar en Galicia para atraer as rodaxes de películas e series de televisión e utilizalas para xerar a imaxe de destino desexada. O grupo buscará tamén as ferramentas necesarias para aproveitar o patrimonio cinematográfico do noso país tanto dende o punto de vista de produto cultural como de instrumento de proxección da imaxe turística. O proxecto conta cunha subvención de máis de 60.000 euros concedida pola Dirección Xeral de I+D da Xunta de Galicia e deberá estar rematado a finais do ano 2012.Para levar adiante o traballo os investigadores seguirán unha metodoloxía de estudo científica e así o explica José Antonio Fraiz. “Primeiro traballaremos na elaboración dun marco teórico proporcionado pola revisión dos artigos e demais documentación recollida na literatura”. A realización de estudos cualitativos mediante entrevistas a expertos no tema, a análise das iniciativas postas en marcha por outros países e a análise de películas e series de televisión completan un programa que atopará un oco tamén para as películas e series que teñen que ver con Galicia.
Análise de películas e series de televisión
Unha parte importante da investigación vai consistir na análise de películas como A lingua das bolboretas, O lapis do carpinteiro, Lena, Trece badaladas, Sempre Xonxa , Pradolongo e Los girasoles ciegos, entre outras e nunha liña de traballo na que non podían faltar as series de televisión coa análise de produtos como Padre Casares, Mareas Vivas e tamén co estudo da repercusión que ten aparecer en series nacionais como é o caso de Hospital Central.Os investigadores consideran que hai actividades de márketing que se poderían por en marcha antes e despois da estrea da longametraxe, como son avaliar o mérito dunha filmación en termos do seu valor promocional, animar ás estrelas de cine a difundir o lugar de rodaxe, patrocinar este tipo de iniciativas e planificar actividades para a promoción doutros produtos turísticos como a arte, a comida, a artesanía, a música e a moda. Por todo isto Fraiz Brea cre que é moi importante por en marcha unha proposta de tipo estratéxico entre os axentes dos sectores audiovisual e turístico para facilitar as rodaxes como ferramentas de promoción da imaxe do destino. Realizar unha proposta para determinar a imaxe que os destinos turísticos conseguen a través das longametraxes, deseñar un modelo de explotación do turismo cinematográfico en Galicia e crear e comercializar produtos turísticos cinematográficos son outros obxectivos do proxecto de investigación.