As III Xornadas de Turismo Enolóxico afondan nas posibilidades de Galicia para explotar os recursos do viño

O turismo de sol e praia xa non triunfa como anos atrás, agora a xente pide algo máis ás súas viaxes: coñecer novas culturas e tradicións, mergullarse na vida de cada lugar, degustar a súa gastronomía e satisfacer todos os sentidos. Ante estas novas tendencias, o viño e a contorna na que se elabora é unha das liñas de futuro para o desenvolvemento do turismo e, nese sentido, Galicia ofrece grandes posibilidades para explotar este tipo de actividade. Precisamente, coa intención de dar a coñecer esta tendencia, este martes deron comezo no Pazo do Castro no Barco de Valdeorras as III Xornadas de Turismo Enolóxico.
Encadradas dentro da programación académica do Máster en Dirección e Planificación do Turismo e baixo a coordinación de José Antonio Fraiz, director do posgrao, estas xornadas “son un complemento á formación dos estudantes, xa que afondan de xeito específico na materia”. Ademais de destacar o carácter educativo das sesións, Fraiz tamén apuntou que servirán para que “os profesionais do sector e os universitarios convivan e compartan coñecemento”. Non só se trata de afondar nas posibilidades do turismo enolóxico senón de “coñecer distintos territorios galegos e establecer contactos”. Por este motivo cada edición que se realizou das xornadas tivo un escenario e unha denominación de orixe diferente, “o primeiro ano fixémolas na Ribeira Sacra, o segundo no Ribeiro e, se todo segue así, a cuarta edición será en Monterrei”, adiantou Fraiz.
Afondando un pouco máis na temática das xornadas, Fraiz destacou as posibilidades deste tipo de turismo e “a necesidade de levar a cabo accións neste eido, xa que dispoñemos de moita superficie de viñedos e, polo tanto, de paisaxes turísticas”. En Galicia xa existen accións orientadas a explotación deste tipo de ocio, como as rutas do viño na Ribeira Sacra, sen embargo, “o seu desenvolvemento non é todo o satisfactorio que podería ser, non se están a aproveitar todos os recursos dos que dispoñemos”.

Visitas turísticas e relatorios

A primeira xornada, que contou con 20 participantes, tivo un marcado carácter de ocio e cultura. Tras o acto inaugural, que correu a cargo de Fraiz, deu comezo a única sesión teórica do día, unha mesa redonda moderada por Patricio Sánchez, profesor da Facultade de Ciencias Empresariais e Turismo, na que participaron o catador Antonio Raluy, responsable de Viños Consentido; Carlos Parra, do Hotel El Ciervo e Marcos González, do restaurante Casa Galaica. Os tres relatores ofreceron a súa perspectiva sobre a interrelación da historia, os produtos turísticos e o viño como elemento atractivo para os destinos dos turistas. Ao remate desta sesión, ás 11.00 horas, deu comezo a parte máis lúdica do programa co percorrido polas instalacións do Pazo do Castro, sede das xornadas, e as visitas guiadas ás Ermitas, “para coñecer a realidade sacra, a igrexa e a súa contorna”, e a viñedos ancestrais como son os lentellais de O Bolo. Xa pola tarde, despois do xantar continuaron as excursións coa visita ás adegas de SAT Godeval e A Coroa. A xornada remata cunha cata de viños no Consello Regular da Denominación de Orixe Valdeorras.
A sesión do mércores terá un carácter máis técnico e académico. Ao longo da mañá terán lugar tres relatorios que afondarán “na utilización do mundo do viño para o turismo, a súa situación actual e as perspectivas de futuro, a comercialización e o márketing deste tipo de produtos e a creación de marca no mundo do viño”.