Internet, un aliado moi valioso para o contribuínte

Estamos en período de presentación da declaración da renda 2011 e é momento de saldar contas coa Axencia Tributaria. Para que o resultado sexa o máis favorable posible, os contribuíntes dispoñen dunha serie de ferramentas gratuítas en Internet. Trátase de programas informáticos, simuladores, documentos ou impresos, dispoñibles nas páxinas webs das administracións, que teñen o obxectivo último de facer máis fácil a tramitación de impostos para os cidadáns e para as propias institucións. Co obxectivo de dar a coñecer a súa existencia e aprender a sacarlles o máximo partido, o campus de Ourense acollerá do 22 ao 29 de xuño o curso de verán Fiscalidade aplicada e Internet.

“Dende o curso 2000/2001 os docentes do Departamento de Economía Aplicada da Universidade de Vigo vimos impartindo actividades complementarias de fiscalidade neste campus. Se ben outros anos ofrecíamos algunha sesión práctica cos programas de axudas para a liquidación dos impostos, este ano apostamos por un curso centrado no uso destas ferramentas”, explica Alberto Vaquero, director do curso xunto ao docente Fidel Picos.

Programas PADRE, ALIS e moito máis

Alberto Vaquero destaca que “todo o que sexa axuda para o contribuínte benvida é, e no caso da liquidación de impostos as ferramentas que hai en Internet son moi intuitivas e fáciles de manexar para calquera persoa”. Por ser o máis coñecido, o máis empregado e ter un manexo moi doado, os coordinadores do curso salientan a utilidade do programa PADRE, o que se utiliza para liquidar as obrigas tributarias do Imposto da Renda das Persoas Físicas (IRPF). Tamén recomendan a familiarización co programa de cálculo das retencións das rendas do traballo da Axencia Estatal da Administración Tributaria; co programa do Imposto sobre Sociedades e o Imposto sobre a Renda de non Residentes e co programa de axuda para a Liquidación do Imposto de Sucesións (ALIS), este último dispoñible na web da Consellería de Facenda. Alén destas aplicacións telemáticas, Alberto Vaquero recomenda botar unha ollada aos recursos de todo tipo dispoñibles na páxina web da AEAT e da Consellería de Facenda, como manuais de axuda, impresos, normativa, procedemento, etc.

Estes programas, comenta Alberto Vaquero, cada ano melloran as súas prestacións e facilidades. Por este motivo, advirte, “é o momento de realizar o salto fiscal á rede”. Entre as vantaxes para o contribuínte apunta a comodidade de poder facer os trámites desde un ordenador na casa ou no traballo, manexar menos papeis, controlar en primeira persoa a xestión dos impostos, valorar diferentes escenarios posibles para escoller o máis favorable e incluso recibir antes a devolución de diñeiro en caso de, por exemplo, a declaración da renda. Entre as vantaxes para a administración están a de axilizar a tramitación e execución de cobros e reducir a tramitación en papel. Os directores do curso, xunto aos profesores Miguel Rodríguez, Xosé Carlos Álvarez e Xosé Manuel Rodríguez e aasesora fiscal Beatriz Brage, serán os encargados de debullar todas estas cuestións no curso de verán Fiscalidade aplicada e Internet.