Diego Germade recibiu o premio do concurso de ideas e de execución dun mural no Pavillón Universitar
Unha mostra permanente do talento que hai no campus
Os traballos presentados a este certame serán expostos na Casa das Campás no mes de xuño
“Que mellor mostra hai do que pode facer o noso alumnado que un proxecto real e visible por todos?”, preguntouse a ex-vicerreitora do campus, Antonia Blanco, na entrega do diploma que acredita a Diego Germade como gañador do concurso que mudará para sempre o aspecto exterior do Pavillón Universitario. En calidade de presidenta do xurado que seleccionou o deseño deste estudante do máster en Arte Contemporánea. Creación e Investigación, Blanco acompañou nesta xornada ao seu sucesor á fronte da Vicerreitoría do campus, Juan Manuel Corbacho, no acto que serviu para presentar o mural que a partir do 30 de xuño decorará o exterior do edificio.
Unha intervención artística “harmoniosa coa contorna, sostible e perdurable no tempo” era o que a Vicerreitoría buscaba con este certame aberto a todo o alumnado do campus, como explicou Corbacho, que agradeceu a “extensa participación” nun concurso dotado cun premio de 2000 euros. Tralo acto de entrega, que tivo lugar hoxe mércores na Casa das Campás, este proxecto pasa agora a unha segunda fase, a da execución do deseño proposto por Germade, para o que disporá dun orzamento de 5000 euros. O proceso, que realizará xunto cun equipo de traballo, comezará nas vindeiras semanas.