Comezou no campus de Ourense un curso de verán sobre a crise cultural
Unha ollada ao grupo Nós como escusa para impulsar as humanidades
Coa participación de arredor de 43 docentes das tres universidades galegas
“Estamos vivindo unha crise dos estudos humanistas e galeguistas e é o momento de ver que estratexias podemos empregar para revertela e fortalecernos de cara ao futuro”. Con esta idea, explicou Camilo Fernández, director curso A crise dos estudos de humanidades e a tradición do galeguismo á luz de Nós, desde este martes e ata o venres danse cita no campus de Ourense destacados nomes da cultura galega e das súas principais institucións. Para soñar con mudar ese futuro, os organizadores do encontro quixeron partir do esplendor do pasado, concretamente da xeración Nós e da súa revista.
O curso de verán foi inaugurado este martes por María Lameiras, vicerreitora do campus de Ourense; Camilo Fernández, coordinador do curso; Rosendo Fernández, vicepresidente da Deputación de Ourense; e Miguel Moreiras, de Novagaliciabanco. “Esta xornada é unha mostra máis das sinerxías e da colaboración entre institucións, que neste caso permiten a celebración no noso campus dunha cita tan relevante e para falar de algo tan importante como a crise das humanidades e do galeguismo”, explicou María Lameiras. “Hai que facer un repaso á historia porque os pobos que non lembran non teñen presente nin van ter futuro”, engadiu Rosendo Fernández.
Etnia por cultura
Para avanzar nun futuro mellor para os estudos humanistas e galeguistas, salientou Camilo Fernández, é necesario botar unha ollada “ao valor e á vixencia que teñen as formas e os contidos da revista e do grupo Nós, que tanto prestixio deron e dan a Ourense”. Como historiador e presidente do Consello da Cultura Galega, Ramón Villares foi o encargado de introducir aos asistentes ao curso no papel desa xeración galeguista. “A achega do grupo Nós é esencial para a cultura galega e segue a selo, coas súas mudanzas e matizacións”, destacou Villares durante a súa intervención.No debullar da historia, dos personaxes e do contexto de Nós, o historiador salientou que “non todo empezou con Nós pero si é certo que son un fito no camiño, pois mudaron algúns dos criterios marcadores de Galicia”. Deste xeito, Villares explicou como esta xeración substituíu a demostración étnica, defendida por Manuel Murguía, pola cultural á hora de falar da idea de Galicia. Deixando nun segundo plano a cuestión étnica, “este grupo de intelectuais foron os que mellor e máis conscientemente reflexionaron sobre a cultura como factor esencial e diferencial de Galicia, como a súa sexta flota”, apuntou o presidente do Consello da Cultura Galega.
Así como noutros países o valor diferencial empregado é a relixión, o idioma ou a estrutura social, no caso de Galicia, dixo Villares, “a cultura é o fundamento que nos define no mundo”. Este troco de perspectiva non foi a única achega do grupo Nós, xa que, destacou o historiador, entre outras moitas cousas a él débense aspectos como a introdución do galego na prosa, a realización de ensaios ou a aposta pola compoñente europeizante.