Organizadores de eventos deportivos explicarán as súas chaves de éxito

“Toda práctica deportiva, sexa profesional ou non, ten como colofón final un evento deportivo máis ou menos grande, que pode ir desde unha simple exhibición ata a celebración dun encontro”. Deste xeito explica Patricio Sánchez, docente da Universidade de Vigo, o peso que no mundo do deporte ten a celebración de eventos, tema central dun curso complementario que a Facultade de Ciencias Empresariais e Turismo do campus de Ourense acollerá os días 30 e 31 de marzo e 13 e 14 de abril.

O curso, titulado Organización e desenvolvemento de eventos deportivos: as chaves do éxito, “terá un carácter eminentemente práctico, sendo os responsables da organización de eventos os encargados de explicar aos asistentes o traballo que require a organización e desenvolvemento deste tipo de actos”, destaca Patricio Sánchez. Para ofrecer esta visión práctica do xeito máis amplo posible, o programa contará con organizadores de citas deportivas internacionais, estatais e galegas de diferentes modalidades, desde o remo ao maratón.

Durante os catro días de celebración da iniciativa achegaranse a Ourense representantes dos Xogos do Mediterráneo Tarragona 2017, dos Xogos Paralímpicos Londres 2012 e dos campionatos do mundo de Ciclismo Ponferrada 2014 e de Natación Barcelona 2013. Ademais estará persoal de organización da Copa Europa Triatlón Pontevedra 2011, do Campionato de España de Remo Olímpico, do Maratón Behobia-San Sebastián, da Meia Maratona do Douro Vinhateiro, do Rally de Ourense e do Maratón Penedos do Lobo.

Enfoque práctico e económico

“Esta actividade enmárcase na liña de traballo do noso centro en todo o relacionado coa faciana económica do deporte, unha faciana que queda moi patente no caso dos eventos, que son a forma última a través da cal se visualiza o deporte”, explica o vicedecano da Facultade de Ciencias Empresariais e Turismo. Por este enfoque económico, o curso, ademais da exposición práctica dos relatores participantes, contará cunha mesa redonda de debate sobre como está afectando a crise á celebración deste tipo de citas.

O curso está especialmente dirixido ao alumnado da Facultade de Ciencias Empresariais e Turismo de Ourense e ao resto de membros da comunidade universitaria pero tamén esta aberto a todas aquelas persoas interesadas en temas vinculados co deporte e coa actividade física que cumpran as condicións de acceso. O importe da matrícula é de 25 euros para o alumnado da Universidade de Vigo e de 49 euros para o alumnado externo.