Os equipos de baloncesto manteñen os seus resultados desiguais na recta final da liga

As ligas de baloncesto nas que participan os equipos do campus de Ourense están xa na súa recta final e nesta última etapa os conxuntos universitarios manteñen as que foron as súas notas características ao longo desta tempada. Despois dos encontros disputados esta fin de semana, o Universitario Campus de Ourense feminino continúa segundo na dura loita co Arxil Mafari Café polo liderato da súa competición. Pola súa banda, o masculino acumula a súa cuarta derrota consecutiva nunha liga que lle está resultando especialmente costa arriba aos xogadores que adestra Javi Pérez.

As xogadoras enfrontáronse o sábado contra o ED Lourenzá Ensino, ao que gañaron 77-67 puntos. Con este resultado as ourensás acumulan a súa terceira vitoria consecutiva e acurtan distancias co líder da liga, o Arxil Mafari Café, que conta cunha unha vitoria a maiores. Deste xeito, os dous equipos manteñen ata o último momento a súa loita por facerse coa copa da 1ª División Autonómica Feminina na que participan esta tempada.

Na 1ª División Sénior Masculina a competición non é tan favorable para o equipo universitario do campus de Ourense. Os xogadores que adestra Javi Pérez, que están a pagar a inexperiencia nunha liga á que ascenderon esta tempada e as numerosas lesións padecidas, acumularon esta fin de semana unha derrota máis. O Universitario Campus de Ourense masculino xogou contra o Clube Baloncesto Xove e perdeu cun marcador final de 75-68 puntos. Con este resultado os ourensáns mantéñense no posto 11 da liga, con 10 vitorias e 15 derrotas.

Categorías inferiores

Tamén xogaron esta fin de semana as categorías inferiores, tanto de baloncesto coma de rugby. O Campus Ourense Blanco Amor de baloncesto júnior gañou o domingo ao Peleteiro 45-40 puntos, un resultado que sitúa aos ourensáns no posto oitavo, con 9 vitorias e 13 derrotas. Pola súa banda, en rugby e xa co primeiro equipo coa liga rematada, os xogadores da categoría infantil enfrontáronse aos Ingleses nun partido que rematou cun marcador final de 10-5 puntos e unha derrota para os rapaces ourensáns.