Os expertos en espectrometría de masas póñense ao día en Ourense

En xullo de 2011 o Grupo Bioscope da Facultade de Ciencias do campus de Ourense organizou o 2nd International Congress on Analytical Proteomics ICAP, que reuniu a 260 investigadores de 35 países. Froito do éxito daquela cita desde este luns celébrase no Hotel Laias Caldaria a Ourense Conference on Imaging Mass Spectrometry (OurCon 2012). Durante os vindeiros días 185 participantes de 28 países intentarán pór en común e avanzar na metodoloxía, aplicación e futuro desta técnica, especialmente no caso da súa aplicación médica en enfermidades coma o cancro.

A cita foi inaugurada por Jesús Vázquez, conselleiro de Cultura, Educación e Ordenación Universitaria; polos profesores e organizadores do encontro José Luis Capelo e Carlos Lodeiro; por Liam A. McDonnell, da Universidade de Leiden, en Holanda; por Garry Corthals, da Universidade de Turky, en Finlandia, e por Gabriel Alén, alcalde de Cenlle. “Como ourensán, como profesor do campus de Ourense e como conselleiro de Cultura, Educación e Ordenación Universitaria para min é unha gran satisfacción inaugurar esta xornada, que coloca a este campus non só como un referente na provincia senón tamén no ámbito estatal e internacional”, salientou Jesús Vázquez na apertura das xornadas, que coincidiron coa inauguración do curso universitario.

Segundo explicaron José Luis Capelo e Carlos Lodeiro, as xornadas reúnen a 185 participantes de 28 países entre os que destacan as representacións procedentes de Alemaña, Holanda, Canadá, USA, Xapón e Bélxica. “A espectrometría de masas é unha técnica pioneira para a detección molecular e de biomarcadores, con moitas posibilidades de aplicación en doenzas coma o cancro”, salientou José Luis Capelo. Deste xeito, apuntaron, nos hospitais estase a aplicar de xeito complementario ás histoloxías, por exemplo nas biopsias de tecidos afectados por enfermidades dexenerativas, co obxectivo de chegar a un nivel de detalle que as técnicas tradicionais non permiten.

Salto á grande escala

Ata o vindeiro día 5 de setembro os participantes teñen como obxectivo pór en común os seus coñecementos nas metodoloxías de preparación das mostras que van a ser analizadas con esta técnica, nos instrumentos que empregan, na validación de datos e na súa transformación en coñecemento útil. Deste xeito, os organizadores fixeron fincapé na importancia da transferencia do coñecemento neste eido e na súa estandarización e normalización, para acadar un mellor aproveitamento dos avances que se realizan en beneficio último da ciencia e da sociedade no seu conxunto.

A Ourense Conference on Imaging Mass Spectrometry está organizada no marco rede europea Mass Spectrometry Imaging: New Tools for Healthcare Research (COST Action). Por este motivo, durante a cita realizarase unha reunión de dita rede, na que o Grupo Bioscope actuará como representante español e coa que se pretende dar un paso para contribuír ao establecemento desta técnica na investigación clínica e farmacéutica mediante o desenvolvemento de protocolos estandarizados e o fornecemento de recursos e capacitación necesarios para a súa adopción a grande escala.