Nas eleccións celebradas este martes no Edificio de Ferro
Ourense sacou as urnas para renovar o seu Consello de Campus
Cinco docentes e cinco alumnos proclamados novos membros deste órgano colexiado
Os profesores Enrique Barreiro, Silvana Gómez, Francisco Tugores, María Dolores Fernández e María Beatriz Vaquero e os estudantes Iván Fernández, Santiago Pato, Hadrián Fernández, Luis González e Antonio Fernández converteranse nos próximos días en membros do renovado Consello de Campus de Ourense. Así o decidiron este martes os 23 representantes do PDI e os 13 alumnos e alumnas chamados a votar nunhas eleccións que tiveron lugar no Edificio de Ferro e que definirán a composición deste órgano colexiado de representación e coordinación do campus, do que tamén forman parte o reitor, o vicerreitor e os decanos e directores das diferentes facultades e escolas.
Só os representantes no Claustro da Universidade do PDI e do alumnado estaban chamados a presentar candidaturas e a emitir o seu voto neste proceso electoral ao que concorreron sete representantes do profesorado e seis estudantes. Trece candidatos que non dependían unicamente do resultado das votacións para o seu nomeamento final como novos membros deste órgano, posto que o Consello de Campus debe de estar composto por, cando menos, un membro de cada ámbito científico que estivese representado nas candidaturas.
Proclamación provisional dos candidatos e candidatas
Así, tralas votacións do martes, a Secretaría Xeral publicou hoxe mércores a proclamación provisional de candidatos electos, que será definitiva o vindeiro martes 7 de outubro de non producirse alegacións. No caso do PDI, foron elixidos dous profesores da Escola de Enxeñaría Informática, Enrique Barreiro, con 16 votos, e Sivlana Gómez, con 13. Idéntico número de votos recibiu Francisco Tugores, da Facultade de Ciencais, mentres que María Dolores Fernández, profesora da Facultade de Dereito, recibiu o apoio de dez persoas. Xunto a estes catro profesores e profesoras, tamén foi proclamado membro do Consello de Campus María Beatriz Vaquero, da Facultade de Ciencias da Educación, única candidata do ámbito da Humanidades, que recibiu sete votos e se converteu na única representante do profesorado que repite presenza neste órgano colexiado.No relativo aos representantes do alumnado, Eduardo Pato, da Facultade de Ciencias da Educación, foi elixido con cinco votos; Iván Fernández, da Facultade de Dereito, con catro; Hadrián Fernández, da Facultade de Historia, con dous; e Antonio Fernández, da Facultade de Ciencias, tamén con dous. Xunto a estes catro alumnos, foi proclamado membro do consello o estudante da Escola de Enxeñaría Informática Luis González, único candidato do ámbito tecnolóxico.
Xunto a estes dez novos membros, o reitor, o vicerreitor e os decanos e directores, formarán parte do Consello do Campus os dous representantes do persoal de administración e servizos que máis votos recibiron nas eleccións ao Claustro, e que no caso de Ourense son Luis Pérez e Filemón Rivas. Todos eles serán nomeados membros deste órgano colexiado por un período de catro anos, coa excepción dos estudantes, que foron elixidos para os próximos dous anos.