As artistas Alba Blanco e Amaya González abren as xornadas de performance Chámalle X
Un pouco de xiz e uns zapatos de xeo, material indispensable para volver á infancia
‘Chumba 3’ e ‘Alegoría’ foron as súas apostas para conmemorar os 10 anos de historia desta rompedor
Ducias e ducias de persoas quedaron coa boca aberta na praza de España ao ver como unha doce rapaza tentaba escribir con xiz unha pequena historia no chan. “Érase unha vez” era o único que Alba Blanco conseguiu escribir con claridade. Ao seu carón había outras tres mozas que sen reparo algún borraban, cos seus zapatos de xeo, as verbas que a artista intentaba rotular. Pouco antes, na praza da Peregrina, Amaya González xogaba coa cor dourada e con diferentes materiais na que foi a primeira das performances do Chámalle X deste ano.
A través de Chumba 3 Alba Blanco intentou achegar de novo á infancia aos seus espectadores. “Os contos son o eixo de todas as miñas performances”, explica a artista. O obxectivo de Blanco este venres foi precisamente buscar no interior dos pontevedreses e pontevedresas “a ese neno ou nena que todos e todas levamos dentro e, xogar ao mesmo tempo, coas súas ilusións e fantasías”. Os zapatos de xeo e as trenzas que levaban nas pernas as tres mozas que acompañaban á artista eran o único impedimento para que esta acadase o seu obxectivo.
Pola súa banda, a Alegoría de Amaya González deixou que cada quen interpretase o significado desa cor dourada que a acompañou durante unha boa parte da tarde. Coa súa actuación, González fíxolle unha clara chiscadela ás artes plásticas e ao teatro coa idea de implicar ao público no seu espectáculo.