Cunha xornada de divulgación celebrada en Ciencias Empresariais e Turismo
O proxecto sobre recursos culturais en área de montaña CRinMA amosa as súas ventás de oportunidade no campus
Membros da comunidade universitaria puideron coñecer as súas características
Mellorar as políticas rexionais relacionadas coa protección e promoción do patrimonio cultural nas zonas de montaña. Con este obxectivo estase a desenvolver o programa europeo Interreg CRinMA: Recursos Culturais en Área de Montaña. Dous dos seus socios, o Instituto Ourensán de Desenvolvemento Económico Inorde e a Cámara Municipal de Montalegre, de Portugal, celebraron este xoves na Facultade de Ciencias Empresariais e Turismo do campus de Ourense unha xornada de difusión desta iniciativa á que asistiron membros da comunidade universitaria co obxectivo de coñecer as potenciais oportunidades de participación que ofrece.
Durante a benvida, Virxilio Rodríguez, vicerreitor do campus de Ourense, quixo destacar como este tipo de proxectos “constitúen unha maneira de construír Europa” “buscando eliminar fronteiras e fomentando a interrelación entre espazos”. Neste marco de traballo, subliñou o seu desexo de que os recursos humanos da Universidade fagan achegas ao desenvolvemento deste proxecto e por extensión ao das zonas de montaña implicadas nel. Pola súa banda, o vicepresidente da Cámara Municipal de Montalegre, David Teixeira, salientou como “a fronteira é unha fronteira que nos liga e non que nos separa” e subliñou como CRinMA amosa que “os territorios de montaña podemos ser creativos e innovadores”.
Intercambio de experiencias e aprendizaxe
Segundo explicou na presentación do evento Rosendo Fernández, vicepresidente da Deputación Provincial de Ourense e presidente do Inorde, o proxecto propón tres obxectivos, como son o fortalecemento nas rexións montañosas da fronteira da identidade local baseada no patrimonio cultural, a mellora na protección e uso sustentable do patrimonio cultural nestas zonas e a mellor promoción e transformación creativa do seu patrimonio cultural. Trátase, recalcou, “dunha oportunidade para o intercambio de experiencias e aprendizaxe interrexional” que pode contribuír “a un desenvolvemento máis sustentable destas zonas”.
O proxecto, destacouse na xornada, considera o potencial do patrimonio cultural (tanxible e intanxible) como un activo que se pode utilizar para o desenvolvemento local e rexional. Neste contexto, ademais de mellorar as políticas rexionais relacionadas coa protección e promoción do patrimonio cultural nas zonas de montaña, CRinMA aspira tamén a contribuír “á mellora dos programas transfronteirizas e dos programas operativos rexionais existentes” e fomentar “un pensamento máis complexo sobre o papel do patrimonio cultural nas áreas de montaña, que se traducirá en mellores políticas e programas no futuro”. Ademais da participación do Inorde e da Cámara Municipal de Montalegre, o proxecto conta como socios coas rexións polacas de Malopolska, líder do proxecto, e Podkarpackie; coa Axencia de Desenvolvemento Rexional de Presov, en Eslovaquia, coa Asociación Europea de Representantes das Rexións de Montaña, de Francia, e coa Unión de Municipios de Montaña Piedmont, de Italia. Cun orzamento de 1,2 millóns de euros, a iniciativa desenvólvese desde xaneiro de 2017 ata xuño de 2021.