Rogelio Nogales salienta os beneficios das plantas de compostaxe fronte ás de incineración

A xestión dos crecentes residuos sólidos urbanos é unha problemática á que se enfrontan de xeito diferente en cada territorio. No caso de Galicia optouse principalmente pola súa incineración en plantas como a de Sogama co obxectivo último de aproveitar estes residuos para a xeración de enerxía. Sen embargo, noutras zonas a opción elixida foi a compostaxe. Para falar dos beneficios desta última con respecto á queima, esta semana o campus de Ourense acolleu a visita de Rogelio Nogales Vargas-Machuca, investigador do CSIC e experto neste eido.

Nogales Vargas-Machuca participou en calidade de investigador da Estación Experimental do Zaidín de Granada-CSIC nunhas xornadas do Doutoramento en Ciencia e Tecnoloxía Agroalimentaria organizadas pola Área de Edafoloxía e Química Agrícola na Facultade de Ciencias. As súas intervencións estiveron centradas na compostaxe como biotransformación dos residuos sólidos urbanos, na vermicompostaxe como tecnoloxía de baixo custe para a valorización dos residuos orgánicos e na utilización agrícola e ambiental dos composts e dos vermicomposts resultantes.

Reutilización do produto

Cun enfoque da problemática desde a súa área de especialización, a compostaxe, o investigador salientou o seu rexeitamento á opción da incineración como fórmula de tratamento do lixo que xera a sociedade. “A incineración non é unha práctica sostible e de feito Galicia é a única que optou por esta vía en vez de pola compostaxe”, apuntou o investigador, que salientou que o único aval desa técnica é que permite a obtención de enerxía.

Fronte a esta opción, Nogales Vargas-Machuca destacou os beneficios da compostaxe para reutilizar os residuos orgánicos que xera a sociedade como emenda orgánica en solos e potenciar así unha agricultura sostible. Os froitos desta técnica, os composts e vermicomposts, “poden ser empregados como substitutivos ou complementos ao fertilizantes químicos”. Tamén pode ser empregados, por exemplo, para recuperar solos degradados pola contaminación con metais pesados ou pesticidas. “Mediante a compostaxe intentas recuperar e empregar os recursos contidos nos residuos”, explicou o investigador. Pola contra, advertiu, a incineración “non é un sistema de reciclaxe” senón que se queiman os residuos para obter enerxía liberando á atmosfera CO2.

Alén de participar nestas xornadas, o investigador destacou na súa visita a estreita colaboración que manteñen desde a súa institución coa Universidade de Vigo no eido do tratamento de residuos, especialmente en temas como o da vermicompostaxe. Nesta colaboración, Nogales Vargas-Machuca quixo facer especial mención ao traballo realizado con Salustiano Mato e co seu grupo de investigación antes do seu nomeamento como reitor da Universidade de Vigo.