Guillermo Suárez, profesor de Dereito Romano da Universidade de Vigo:
"Roma creou os piares xurídicos dunha economía de mercado"
É autor do libro "Dereito das empresas en Roma. Proxección no dereito portugués actual das empresas"
Na súa etapa de expansión imperial –s. II a.C. – s. III d.C.- Roma creou unha economía globalizada. Segundo explica Guillermo Suárez, profesor de Dereito Romano da Universidade de Vigo, as empresas romanas operaron en todos os ámbitos e sectores. “Os emprendedores importaron e exportaron todo tipo de bens aos mercados conectados de consumo. Os inversores romanos crearon empresas pequenas e medianas e, noutras ocasións, os capitalistas uníanse en sociedades mercantís e montaban grandes empresas que operaban en numerosas nacións e provincias do imperio”, declara.
O mundo empresarial adquiriu tal importancia e repercusión na sociedade romana que os seus piares chegaron ata os nosos días. De feito o profesor Suárez asegura que a nosa civilización “é herdeira da dirección e xestión empresarial do comercio e dos negocios da civilización romana”. Experto no mundo romano, o investigador vén de publicar a quinta edición do libro Dereito das empresas en Roma. Proxección no dereito portugués actual das empresas, destinada especialmente a Portugal, Brasil e aos países de fala portuguesa como Angola. A investigación levada adiante para a publicación da obra permítelle ao docente afirmar que “Roma creou os piares xurídicos da economía de mercado e da dirección de empresas da nosa civilización occidental”. Defende o profesor que estes piares xurídicos e económicos “permanecen erguidos na actualidade e son os apoios sobre os que se asenta a economía globalizada occidental e mundial”.
Unha análise da estrutura das empresas do mundo antigo
As empresas do mundo antigo eran administradas polos fillos e as fillas da familia e polos escravos; de feito o docente asegura que os directivos – escravos podían operar de forma autónoma no mundo dos negocios. “Estaban facultados para crear empresas matrices e delegadas, podían deseñar estruturas económicas variadas mediante grupos horizontais e verticais de empresas para operar e diversificar os riscos”, declara. O investigador asegura tamén que foron frecuentes os contactos comerciais de Roma con Rusia, o norte o o centro de África, Arabia, Asia, India, China “e América? E posible”, sinala.O obxectivo de Guillermo Suárez coa publicación deste libro foi o de analizar a estrutura destas compañías. Xunto a este tema a obra aborda tamén a materia do management, é dicir, a dirección e administración de empresas marítimas e terrestres de Roma e a súa proxección e vixencia no dereito portugués actual.
Para levar adiante o estudo o investigador seguiu o método histórico-crítico na análise das fontes de produción e de coñecemento das fontes do mundo antigo. O resultado é unha obra “ao alcance de todas as persoas interesadas en coñecer o mundo da empresa na civilización romana e a súa proxección na actualidade”, segundo as palabras do docente.
Do dereito romano ao dereito portugués actual
O libro fai unha proxección do mundo da empresa na civilización romana ao dereito portugués actual das empresas. Guillermo Suárez asegura que o dereito mercantil de Portugal “nútrese das fontes xurídicas de Roma e do seu deseño empresarial e comercial”. Con todo o investigador matiza que coa promulgación do Código Comercial Portugués de 1888, vixente ata hoxe, Portugal pasou a ter o seu diploma legal específico para a materia.Deste xeito e segundo explica, “o Dereito Comercial actual non se limita a regular a profesión de comerciante e os actos de comercio senón que se ampliou para tratar toda a actividade empresarial, abrigando a industria, os transportes, os seguros, os bancos e as bolsas de valores”. Con estes datos na man o profesor Suárez asegura que se podería facer tamén unha proxección ao dereito español actual das empresas. Segundo as súas palabras, “o noso Código de Comercio é de 1885. Podemos facer as mesmas similitudes, salvando as diferenzas da lexislación específica, que co dereito comercial e empresarial de Portugal”, declara.