Tecnoloxía viguesa para detectar a falsificación de títulos universitarios

Fividoc é una ferramenta con orixe en Vigo pero cunha proxección moi ampla. Tras catro anos de investigación e traballo na Escola de Enxeñaría de Telecomunicación naceu en 2008 BitOceans, unha spin-off da Universidade de Vigo que ten como finalidade e explotación deste software, elixido agora para certificar a autenticidade dos títulos e certificacións universitarias.

Da man de Universia e da Confederación de Rectores de Universidades de España, Fividoc dotará ás institucións dunha plataforma que proporcione seguridade aos expedientes universitarios, de xeito que se poida verificar cun simple escaneo do documento se o seu contido ten sido manipulado.

Esta ferramenta, que xa ten sido empregada en outros sectores e recabado premios como o Fujitsu It Future 2011 como mellor aplicación Cloud Innovation do ano, foi presentada este mes no Universitary forum Summit celebrado en Valencia. Para o reitor da Universidade, Salustiano Mato, “esta é unha mostra máis do bo facer dos investigadores da institución e do seu potencial de I+D+i”. Para trasladar ese coñecemento á sociedade e ao tecido produtivo, a creación e posta en marcha de Empresas de Base Tecnolóxica no seo da Universidade é unha das posibilidades que, con BitOceans, demostra que é “unha unha vía con garantías con éxito”.

Segundo explica Alberto Malvido, socio fundador e director técnico da compañía, “o portal de validación de documentos universitarios é un servizo ofrecido á comunidade co esforzo de investigadores, egresados e universidades, materialización do grande apoio que a Universidade de Vigo presta aos grupos de investigación para poñer en valor os resultados de investigación en forma de spin-offs, e o impulso que estas empresas reciben da Universidade unha vez no mercado”.

Contra as fraudes de títulos universitarios

As redes e mafias de venda de títulos universitarios falsos atoparán en Fividoc unha dura oposición, xa que o sistema de avaliación é sinxelo e rápido e estará ao servizo da CRUE, das universidades e de terceiras entidades públicas e privadas e, por extensión, da sociedade española en xeral, destinado a detectar a falsificación dos documentos universitarios, evitando así os danos derivados de potenciais fraudes. Ponse ao servizo de todas elas un servizo central de cotexo electrónico dos documentos impresos, en especial das copias auténticas en papel expedidos pola CRUE e as universidades.

Fividoc é unha tecnoloxía horizontal que completa a firma electrónica e empregable en calquera sector empresarial que requira seguridade documental. Ofrecen servizos por exemplo para administración públicas, educación, banca, sanidade, notaría, etc. Entre os clientes cos que conta atópase o Ministerio de Presidencia e varios concellos de Galicia como o de Lugo ou o de Pontevedra, así como a Deputación de Ourense.

Neste tempo, a empresa ten sido recoñecida co premio á mellor iniciativa empresarial innovadora de Galicia en 2008 e co premio Aplicación TIC do ano do Colexio de Enxeñeiros de Telecomunicación de Galicia, así como co Primeiro Premio, Eganet 2010 Administración electrónica.