A termas ourensás abren a programación dos Roteiros Culturais

Patrimonio e natureza únense ano tras ano na programación dos Roteiros Culturais, organizados polo Servizo de Deportes da Universidade de Vigo. Estas rutas a pé polos paraxes máis representativos de Galicia permiten que se colla da man o contorno natural coa cultura e a historia.
A oferta de este ano comprende un total de once itinerarios, que comezan este sábado 20 de outubro coa Rota das Termas. Nesta primeira saída o percorrido terá a súa saída en Ourense para dirixirse ao Castro de Santomé, a Chavasqueira, as Termas de Outariz e volta a Ourense. A distancia total é de 18 quilómetros e está catalogada como de dificultade media. Para calquera das rotas, a matrícula estará aberta ata o martes anterior a cada saída, que terán lugar dous sábados alternos de cada mes. A inscrición pode formalizarse no Servizo de Deportes de calquera campus e o prezo para unha rota é de 8 euros para os membros da comunidade universitaria e de 13 para os usuarios externos. Sen embargo os que se matriculen para varias saídas poderán beneficiarse dunha redución: o prezo de 9 roteiros é de 59 euros e 99 euros segundo se trate ou non de membros da Universidade, mentres que se a matrícula comprende o programa completo sería de 70 € e 115€, respectivamente.
A organización recomenda aos usuarios levar comida e unha muda completa, así como unha indumentaria adecuadas ás condición meteorolóxicas, xa que a maior parte das excursións teñen lugar no inverno. Para esta primeira rota a pé, pola contra, a invitación é a ir equipados con roupa de baño, toalla, e chancletas para os baños termais.

Rutas

Ata o mes de abril están programados once roteiros cunha distancia media de 20 quilómetros. Despois da Rotas das Termas, a seguinte será a Rota do Mosteiro de San Pedro de Rocas, xa no mes de novembro. Nos meses posteriores o programa comprende a Rota do Ribeiro, a Rota de Entrerrías, a Ribeira Sacra, os Canóns do Sil, a Rota de Santa Mariña de Augas Santas, a Serra do Xurés, a Rota do Incio, a Rota Vía da Praza e finalmente, en abril, a Rota do Mosteiro de Montederramo.

Horarios

Estas rotas de sendeirismo cultural terán lugar dous sábados de cada mes ata abril. Dende o campus de Ourense as saídas ata o lugar fixado realizaranse ás 9 horas, mentres que dende Vigo será ás 07:45 h. O regreso está previsto para as 17 horas a Ourense, mentres que a chegada a Vigo será ás 18 horas.
Os participantes poderán obter, por cada tres roteiros un crédito de libre configuración.

 

A programación completa pode consultarse na web do Servizo de Deportes.